Read Southern Rengma Naga LÜHIN 68 Bible Online

LÜHIN 68 - Southern Rengma Naga bible

LÜHIN 68

¹Sunggigü le solo lo a-shwikerüchün nyu dan le nren nru la. A-shwi rüchün kehü dan a-mhundyü nyu hüpe shwe la.

²Mah kekhu nmhü pe shwela kehü hontse, a-le anyugun hüpe shwela; khumen le mah mhundyü nyu zunla kehü hontse, serikemvu nyu le Sunggigü mhundyü nyu nkela ti.

³Ai kemitsin nyu we Sunggigü mhundyü nyu a-nyun nyü lo sherhün hü; anyugun le anyu kenyüo nrasen hünyo.

⁴Lü thyüpe Sunggigü kishü, lü thyü a-zan shwenlo; nmhu ge ryü kejü gü tson nda shülo. A-zan le Npugü le, a-mhundyü nyu n kenyü lo!

⁵Kershvuka kenshün günyu yhunkehü, Sunggigü le, tegonyu dan nucha lo maginyu ntsen hü nyo.

⁶A-le ka nme pe a-npvü kehü gü no a-nyu yhun lo donyu dan zen chwiryüo no shekerhün thyü lahü, ai me jozen hü kemvu nyu we no mele khe kela kazü nyu yhun ti.

⁷O Sunggigü, nle n temi dan tsonri kehü ka, nle tsonchüo kazü kesigü nken kechwi ka,

⁸kazü güle n nula, lo tsangri pe ja keshü thyü tsü ryüla, Sinai Sunggigü le keryü genyu, Israel Sunggigü le keryü ka.

⁹Nle tsang no risa shü tson-o n kazü gwamvu kela gü thyü nbwen nilo;

¹⁰n temi dan le tsünyu anyugun ka thyülo; n kegwanyu nle rhokedyü gü genyu ndoshü.

¹¹Npugü le ahza khishü tson-o tenunyu kechon le jolo kenjün shü:

¹²“Raja dan lo anyugun rihüdan le kehü tinla so!.” Kanyu kebin tenunyu jule kenya khinkelo dan kenjünlo la:

¹³rakagi pe jepfü kehü nsu dan joja hontse, anyugun sekin le suna kenshün lo thyüpe shweshwe tse. (Nyu thyüo hagun peha le teri kethyü jon nyü tanyü bin nyu bin hü nla?)

¹⁴Kekvutsin sunggigü le Raja dan hü kezen pe Zalmon kazüthun ge keshü ka, a-le khütso no tsünyu che tsüryü.

¹⁵Bashan le kazüthun gon pe dihontse kethyü nme la, a-ra kechon le kebin kazüthun nme!

¹⁶Nyu thyüo nle n kazüthun ra ketetso ge bin-o Sunggigü le a-ge yhun titse kejü kelo kazüthun gü nrio shwinyü hü nla? Npugü le kethonthen tsünyu yhunti!

¹⁷Npugü le a-kerugari yie yie zen-o Sinai nyu bin-o kenshün bin günyu ryü.

¹⁸A-le do kechon tenzen-o ketetso ge küla; a-le me jozen kemvu temi dan ka kenrun nyu tha khilo. Npugü Sunggigü le tsünyu yhun ti.

¹⁹Khenyütsen ngun khvukensu pfüshü kehü gü, Sunggigü shwen le; a-le ngun kenishü kehü Sunggigü le.

²⁰N gun Sunggigü le me kenishü kehü Sunggigü; a-le Npugü, kesinyu ngun kenishü kehü n gun Npugü le.

²¹Sunggigü le a-shwikerüchün nyu, anyugun kemu tson nyu tserü kehünyu dan pe boren lati.

²²Npugü le zo hünyo, “Ale Bashan ki hagun shwikerüchün nyu zen niryü ti; ale züda kentsun ki anyugun zen niryü ti,

²³tson-o hagun no anyugun zi rhün ti, lo hagun hon tehi dan no lvünyü kebin then lvü loti.”

²⁴O Sunggigü, nle kvukelo tsonkechü temi aphu hyu laso, Sunggigü, araja gü le tsonchüo a-kenshün bin nyu yü.

²⁵Lü kethyünyu dan le ri, khwenkela nyu dan le khin, lo tsü jaka lünyu dan le lükhin kekho tse.

²⁶“A-temi dan kehun nyu Sunggigü shwenlo; hagun Jakob tsipwen dan aphu Npugü shwenlo!”

²⁷A-keri le kami keshe tsingü, Benjamin, tsüsika Juda sharhi dan le a-logwa zen, Zebulun lo Naftali sharhi dan le tsüsithen-o ryü.

²⁸O Sunggigü, nkekvu pe hishüta, nle a gun sunka sen kehü

²⁹Jerusalem nyu Kershvuka nyu, raja dan le kenrun nyu thakhi senryü n ketsü gütsü.

³⁰Nbala nyu kehü tehen thyügü, Ijipt tsü rho lalo; senye dan, methutse dan lo anyu dan, anyugun le aphu tsenyo tsüryüo rakagi senryü ntsü kemvu then rho lalo. Teri le a-kenyü kehü temi dan tsü hü kezen lalo!

³¹Ijipt nyu kedanyu le ryüti; Ethiopia nyu le ben shwen-o Sunggigü ka kehi thyüti.

³²Kazü rajaphen dan lü thyüpe Sunggigü ki shülo, lü thyü Npugü shwenlo,

³³tsang, ndukanyu kebin tsang so ge kehü gü. N hope kvusa lo nrasen kebin gü khwen nyü lota.

³⁴Sunggigü kekvu pe zoshülo; a-kekvu le Israel so bin nyo, a-kekvu le tsangge bin nyo.

³⁵Israel Sunggigü, a-Kershvuka nyu chwiryü kejü Sunggigü tsüle ditsüki kenrin thyüla! A-le kenko lo kekvu pe a-temi dan tsü hü. Sunggigü Shwen.