Read Southern Rengma Naga LÜHIN 69 Bible Online

LÜHIN 69 - Southern Rengma Naga bible

LÜHIN 69

¹O Sunggigü, a kenishü ta! Zü le küryü agunda ki laso;

²ale a phachwin kendi dyükenbe kentsun nyu yüla so; ale zü kentsun nyu yüla lo zükentyü le a nrheshvu güzhü laso.

³Ale keche hipe a hokeli laso, a tero le sin laso. Ale nkeche nripe ayhü nyü ho laso.

⁴A-kon kendi ka ashwi ntsü kehü nyu dan le apehü nyekie chon. A shwikerüchün dan le nkuo a ntsun: anyugun le kvu tson-o anyugun le a dushvula nyü hünyo. Anyugun le ale rühulo kemvu kanyü dan ano khini pe tsü.

⁵O Sunggigü, a kemu dan le n mhundyü nyu kebu lomvu; ale dihontse pin hüyo nle shabin nyo.

⁶A no keja kepfü senryü n tenyen kehü nyu dan ge shüla nyata, Npugü, Danda dan Sunggigü! A no tetsin senryü n rühvu kehü nyu dan ge shüla nyata, O Israel Sunggigü!

⁷Meno a nshwe nyhün kela lo keja kepfü lope aje kethyü tsüle n genyu le.

⁸Ale a tsasikezen nyu mhundyü nyu tesin hontse, lo a kaminyu mhundyü nyu sin rünyi kechanyu hontse laso.

⁹Ale n Kershvuka genyu anyun le ho kethyü tsüle mah hontse anyun nyu ro bin nyo; mele n kemüni kethyü dan tsüle age che tsüryü laso.

¹⁰Ale nyen-o a npvü athyü ketsenyo hü, lo temi dan le a kemüni;

¹¹ale a npvü nyun gwakemvu phi ben nya bin, lo anyugun le a shwinyü.

¹²Anyugun le tsonda nyu arüla zo kenthon, lo kenzeü nyu danle age keron lü thyü.

¹³Ai a we le, nka kehi thyü tile, Npugü; nle kejükelo gwünkho ka, a kehi kenishülo. N keso keda genyu a kehi kenishülo, nle kenishü titse zo kejün tsü thyü shüti.

¹⁴Dyükenbe günyu yükejü a kenishü ta; a shwikerüchün nyu ben ka, lo zü kentsun günyu a ntsen lo.

¹⁵Zükeda gü no tsun a soryü la nyata; a no kentsun ki a nrhe shvula nmvue sika gü nyu yüla nyata.

¹⁶Npugü nle sozin kehü nkegwa günyu a kehi kenishü ta; n shwikenjün keda nyu rani aki ryüta!

¹⁷N gogü kebu tin la nyata; ale kenjün thyü sabin nle ntsoka a kehi kenishü ta!

¹⁸A kiryüo a kenishü ta; a shwikerüchün nyu ben nyu a süshwilo.

¹⁹Dihontse mele a nshwe yo, ditsülaki ale kejapfü lo tetsinpfü yo nle shabin; nle a shwikerüchün nyu dan aphu shakü bin nyo.

²⁰Mele a kenshwe le anyu boren laso, lo ale a shekese thyü bin laso. Ale temi peha no a njün keshü nrin hü, ai nme ndi; peha no anyun thyü nbwen shüti ado tse, ai nme hyulo mvu.

²¹Ale n nyo kelaka, anyugun le terün pe atsü; ale teri kelaka, anyugun le keshonzü pe ala.

²²Anyugun ketyü ketsü miz no anyugun kenke thyüla nda; anyugun kenshün keho dan tsüno anyugun thyüpe chela nda.

²³Anyugun yhütyü no zün lalo! A-zintse anyugun sen no kvumvu la nda!

²⁴N nyun kekhü jape anyu ge shüla ta; n nyun kenta no anyugun tenlo lalo.

²⁵Anyugun ka no nrun la; temi nme no tsünyu yhun nya.

²⁶Anyugun le nle shaja pe ketsünyu nthyü nnyü kehü genyu, anyugun le nle jün keshünyu kenjün kethyü dan rüla kera kehü genyu.

²⁷Anyugun kemu aphu thu njülo; n kenikelo nyu anyugun jün keshanyue bin nyalo.

²⁸Kerhün nyu lesü günyu anyugun zen shon lalo; n temi dan zan thu kebin nyu anyugun zan lope sin nya le tse nda.

²⁹Ai ale kenjün thyü lo a shese bin nyo; O Sunggigü, a penso shüo a kenishü ta!

³⁰Ale lü nme thyü-o Sunggigü shwen ti; ale keshwen pe a-tsüo a-keda rüla pe zo ti.

³¹Hile methu pe a-kerüshvu nyeki Npugü le a-kenyü kvu ti methutse kechün pe kershvu kethyü nyeki.

³²Mele nshwe kehünyu le hi hyu keshü ka anyugun kenyü lati lo senyu le Sunggigü rüshvu hüyo tsünyu thyü kepeche loti.

³³Npugü le rhokedyünyu khwen nyüshü hünyo lo a-temi dothyü kebin nyu nmhin la hümvu.

³⁴O tsang lo kazü züda lo tsünyu kehü nyukhu aphu, Sunggigü shwenlo.

³⁵Sunggigü le jerusalem kenishü ti lo Juda nyida dan thyüso nishü. Tson-o a-temi dan le tsünyu yhun-o kazü gü sen loti;

³⁶a-gonyu nyenyu jule tsü gwen ti, lo a-so kehünyu le tsünyu yhunti.