Read Southern Rengma Naga LÜHIN 71 Bible Online

LÜHIN 71 - Southern Rengma Naga bible

LÜHIN 71

¹Npugü, n no a ntsen lo lotse ale nki ryü bin nle; thame kae a no kvulomvu kela thyü nyata!

²Nle kemitsin genyu a keche shülo a süshwi shüta. A khwen nyü shüo a kenilo ta!

³Nle a keno tsonye lo achwida kenko nme thyüo a kenishü ta; nle a tsonye lo a chwida le.

⁴A Sunggigü, serikemvunyu ben nyu, lo temi rigwakemvu kekvunyu a kenishü ta.

⁵Kedatsin Npugü, ale a kenrin pe n ge shübin nle; ale a nche kanyu n tenyen hünyo.

⁶Ale a keyhunthen n ge ngü hü; a nnyukelo jon gerho nyu nle a ntsen ryü laso. Ale a-zintse n shwen ti.

⁷A keyhun le temi kechon mhundyü nyu tsinhi thyü ryü, nle a kesun kenko gü thyü keryü genyu.

⁸Ale jon gwün n shwen lo n zankechwi rüla pe meka zohü nyo.

⁹Ntsoka a kethen gwünki a kenila nyalo; ale kvumvu kela ki a khela nya ta.

¹⁰A shwikerüchün nyu le adushvu lanyü bin nyo; anyugun le a ntsun-o tedarhi lo kenthon hünyo.

¹¹Anyugun le, “Sunggigü le a-khe laso; n gun a-sithen gü tenlo lati khun; temi nme-e a-keni keshüi ndi le,” tson hü.

¹²O Sunggigü, a zen nithen nya; a Sunggigü, whütse ryü a cheshü ta!

¹³A when kehü dan no kvumvu lao nkela nda. A nthyü nnyü titse kehünyu no kejopfü lo kemüni la nda.

¹⁴Ale azintse a kenrin pe n ge shü hüti; ale nshwen chon kenye ti.

¹⁵Ale n kegwa rüla pe zoti; jongwün ale n kenikelo rüla zo bin ti, ale tsüsha ti loho yatse-e.

¹⁶Npugü Sunggigü, ale n kekvu shwen ti; ale nkegwa rüla pe me ka zoti, n rüla nti.

¹⁷Ale ntsenyu kanyu nle a senthyü shü, lo ntsokhin-e ntho ndunkethyü dan tsü zohü zun.

¹⁸Ntsoka we ale then laso lo apehü le pfüchon laso, O Sunggigü, a khela nyalo! Ale n kekvu lo n tho ndunkethyü rüla pe shenhe ryükejü aphu ka zoti laryü azen hülo.

¹⁹O Sunggigü, n kemitsin le kügü tsang ti. Nle tha kedada thyüshü; n hontse kethyü nme ndi.

²⁰Nle thyülo keshvu lo kenjün kethyü nipe a ge shü, ai nle athyü nkvu nishüti; nle kesi günyu a ntsen loti.

²¹Nle a thyü ngon kenye shü ti; nle anyun thyü nbwen nishü ti.

²²Ale lükhin sen-o nshwen tsentsü ti; A Sunggigü, ale n joketsin kezo shwen tile. Ale a lükhin sen-o lüthyü nshwen tile, Israel kenshün gü.

²³Ale lüthyü n keshwen ka a shekerhün genyu nrasen tile; nle a kenikelo genyu ale akeyhun a-pentha sen-o lüthyü ti.

²⁴Ale jon gwün n kemitsin rüla zoti, a nthyü nnyü titse nda kebin dan no kvulomvu lao kejapfü kela genyu.