Read Southern Rengma Naga LÜHIN 72 Bible Online

LÜHIN 72 - Southern Rengma Naga bible

LÜHIN 72

¹O Sunggigü, rajagü no nkemitsin nyu mejün keralo nrün genyu senthyü shüta; N kentsen kenjü pe atsü shüta,

²tsonlo a-le nkentsen kenjü nyu n temi so gon lo kemitsin sen-o mele nshwen kehü nyu ketsen loti.

³Kazü güno nnya kenyeo shekerhün thyülo; tsü no kemitsin sikesha thyülo nda.

⁴Rajagü no kendi nyu jün kera ketunlo; a-no rhokedyünyu kecheo anyugun n shwe kehü dan sokvu lo nda.

⁵Shenhe aphu nyu, tsang le nnyü shü kehü then, lo sheh le ben kehü then n temi dan no n rüshvu hü nda.

⁶Rajagü no tsangri pe lownyu keshü lo tsangkenri zü le kazü ntsen keshü hontselo nda.

⁷A-keyhun then kemitsin chon kenye, lo sheh le ben kehü then gwakenye kethyü no bin nda.

⁸A-rajaphen le züda kagü züda keti, Eufrates ka gü kazü keni keti ti.

⁹A-kenrhinyu dan le a-mhundyü nyu nkhün ti; a-shwikerüchün nyu le anyugun npvü kazü nyu cheti.

¹⁰Spain nyu raja dan lo zükehun kazü dan le kenrun nyu tha khipe a-tsüti; Arabia lo Ethiopia raja hvule tha senryüo a-rüshvu ti.

¹¹Raja aphu a-mhundyü nyu nkhün kü ti; lo tsipwen aphu a-lothyü ti.

¹²A-le rhokedyünyu a-ko kehünyu lo mele shwiso kemvu kendinyu kecheshü hünyo.

¹³A-le kvukemvu lo rhokedyü nyu njün shühü nyo, a-le kendinyu keyhun kenishü hünyo.

¹⁴A-le me kemvu thyü lo me nshwen kehüdan ben nyu anyugun khishwishü hünyo; anyugun keyhun le a-mhundyü nyu a-mintsen.

¹⁵Rajagü no yhun kethon gü thyülo! Arabia ki suna pe a-tsü; lo gwünkho aphu nyu a-ge nyu hibin nda; Sunggigü jochü no a-zintse a-ge bin hülo!

¹⁶Kazü gü nyu shye no kesü kela thyülo; rincho ge ketyü ketsü no, Lebanon ki hontse yhun sülo. Tehen le lowjvü kesü thyü kehü hontse nyida dan ka temi no kesü thyülo nda.

¹⁷Meno thame kae rajagü zan nmhin nyata; yhüko le kebin then a-kegwa rüla no binlo nda. Senye dan aphu no a-le jochü pe rajagü ketsü hontse jochü pe a-nyu ko tsülo tse Sunggigü ka hi nda.

¹⁸Israel Sunggigü, Npugü shwen! A nti nduntho dan hithyü shüle.

¹⁹Kethonthen a-zankechwi gü shwenlo! A-zankechwi no kazü aphu sülo nda. 5 Amen! Amen!

²⁰Hile Jesse nyungü David kehi keni dan.