Read Southern Rengma Naga LÜHIN 73 Bible Online

LÜHIN 73 - Southern Rengma Naga bible

LÜHIN 73

¹Sunggigü le Israel genyu gwa ketsin, a-nyun nshün kehü nyu genyu we.

²Ai a we a kepeche nmhen la kesa; a ketenyen ndila khe tse,

³ale temi serikemvu güle gwakebin hyu keshüka a-ketekho shwipe ayhüthyü kela genyu.

⁴Anyugun le kenjün thyü hümvu; anyu gun le nko nki lo aphusherhün.

⁵Anyugun le temi kechanyu hontse kenjün thyü hümvu; kechanyu hontse anyugun we thyülo keshvu ndi.

⁶Tsügenyu anyu le tyü hontse ketekho khilu lo anyugun jvü gwakemvu khiben;

⁷anyugun nyunki thagwakemvu runshü; lo serikemvu do dan rhio rasa bin hünyo.

⁸Anyugun le me kechanyu shwinyü lo zo nshvu bin hü; lo ketekho-o kechanyu nshwe nrün nda bin hü nyo.

⁹Anyugun le tsangge kehü Sunggigü zo nshvu lo ahza kerü khipe kazü so temi tsü hü nyo,

¹⁰tsügenyu Sunggigü temi jue kerü anyugun ki ryüo anyugun le nyuzo binyo tsü tenyen nyü ho lahü.

¹¹Anyugun le, “Sunggigü le shalo kemvui; ketetsotsin güle fülo kemvui le,” tsonzo hü.

¹²Serikemvunyu le tsü a-keme. Anyugun le kechon le bin lo azintse chonketsin hyulo hü.

¹³Tsonyatselo, ale a npvü nshün kebin lo kemu thyü kemvu tsüle a-kon ndi ole?

¹⁴O Sunggigü, nle athyüpe a no jongwün kenjün thyü; lonyütsen nle shaja pe atsü.

¹⁵Ale tson zola yatselo, ale n temi nme hontse thathyü binmvu la ti.

¹⁶Ale ketekhi higü shalo titse rüchün so, ai tsüle a genyu rüri tsinla.

¹⁷ale n Kershvuka ki gun kemvuthen. Tsüselo ale serikemvu nyu le dihontse la ma bin yo a-kon shalo.

¹⁸Nle anyugun pe pekeshwü kehü bin ki shüla ti lo anyugun no kenke nyu chetsü lati!

¹⁹Gwentse anyugun nke lahü; anyugun le kenrin kethyü keni nyu yüla.

²⁰Anyugun le lonyü soryüo nmin shamvu kela hontse; O Npugü, nle sokeryü ka, anyugun le ndila.

²¹A nyun gwamvu ritsin lo anyun kenjün thyüsa kebin ka,

²²ale nyukhu nme hontse pinla; ale nshalo mvula le.

²³Tson yatse-e ale azintse n kho nni hü, lo nle a ben süzen hü nyo.

²⁴Nle n senkethyü jo pe a tsontsin hü lo kenkhin gü nyü nle a rühvuo azen loti.

²⁵Ale nnyeki kechanyu segü le tsangge bin mon? Nle ahon kela genyu, ale kazünyu nyu tepen sin bin mon?

²⁶A kerüchün lo athyümi le kvumvu la logwa, ai Sunggigü le a kekvu güle; kethonthen agenyu senmvu lo keshvu gü tsüle a-le.

²⁷Senyu le n khela yo nkela tsentsü ti; nle nka joketsin zokemvu dan nkela ti.

²⁸Ai a we le, Sunggigü khonni kehü le ditsüki ndunthyü la, Npugü Sunggigü nyu ano kelo hyulo lo a-le thyü keshü aphu pe meka zoshü.