Read Southern Rengma Naga LÜHIN 74 Bible Online

LÜHIN 74 - Southern Rengma Naga bible

LÜHIN 74

¹O Sunggigü, nle nyuthyüo a gun khepe hihontse la ola? Nle n temi dan gen kethonthen nnyunta bin ti ole?

²Nle gwüngwa nme a-ge yhun kehü bin, Zion kazüthun rüchün shüta.

³Nkeshü kela dan so ge hi tsonchü shülo; a gun shwikerüchün nyu le Kershvuka günyu tha aphu nke bu laso.

⁴N shwikerüchün nyu le N Kershvuka nyu kvukelo khwen thyü nrasen: anyugun le kvulo kela zansü anyugun phikeden pe tsüka shüla.

⁵Anyugun le sen kephün nyu le nri pe senphün kebin hontse.

⁶Anyugun le anyugun nri lo kejonvü pe tesen pe kethyü dan tsü jonkho jonra laso.

⁷Anyugun le N Kershvuka boren la njüo mah pe rola; anyugun la nrüshvu kehü bin gütsü bo nrhu laso.

⁸Anyugun le a gun bo kenmhen shü lanyü bin; kazü günyu kenshün bin aphu mah pe robu laso.

⁹A gun kenshün zansü aphu ndi laso; sidyükesha nme-e hümvu laso, lo dithen laki hihontse bin tiyo temi nme shamvu.

¹⁰O Sunggigü, dithen laki a gun shwikerüchün nyu no nshwinyü bin ti la? Anyugun no kethonthen n zan nkhin bin ti ole?

¹¹Nle nyuthyüo a gun chemvu letse la la? Nle nyuthyüo nben pe nsizin shülo la ola?

¹²O Sunggigü, nle binzen kanyu a gun raja thyü ryü; nle gwün kechon ka agun kenishü.

¹³Nle nkekvu pe züda gü kenjün khola lo züda nyu kehü zürin gü pe vüren la;

¹⁴nle züringü Leviathan pe boren la njüo a-minpe kazü kesi nyu kehü nyukhu dan chvü thyülaso.

¹⁵Nle zükenthün lo zülvu thyüshü; nle züri keda da no sinla.

¹⁶Nle keben lo kezün thyüshü; nle yhüko lo sheh thyüpe a-bin bin kashü;

¹⁷nle kazü gü a-keni thyüshü; nle tsangyün lo tsangseü thyüshü.

¹⁸Ai rüchün shülo, O Npugü, n shwikerüchün nyu lo a-tero kendinyu le n shwinyü n nkhin kebin.

¹⁹N temi a-keche kendi dan hi khepe anyugun shwikerüchün a-jvü gwakemvu nyu ben ka shüla nyalo; mele nshwenyhün kehü dan hi nmhin la nyata!

²⁰Nle agun zen-o kejozen kenjü gü rüchün shüta. Kazü qwün kezün lihikae kekevü le bin laso.

²¹Mele nshwe kehü gü khipe keja pfüla nya; rhokedyü lo kendi nyu dan tsü no nshwen lota.

²²Sunggigü, solo, n npvü nno penlo! A-tero kendi temi dan le jon gwün nshwinyü kebin tsü rüchün shüta.

²³N shwikerüchün nyu le anyugun nyuntao nrasen kethyü tsü nmhin nyalo, n kenrhinyu dan le nrasen bin nyo.