Read Southern Rengma Naga LÜHIN 77 Bible Online

LÜHIN 77 - Southern Rengma Naga bible

LÜHIN 77

¹Ale nra tetso pe Sunggigü kishü; ale nra tetsoshü, lo a-le akhwen nyülo.

²Kenjün kethyü gwünkho ka, ale Npugü ka kehi thyü; khensin ale a ben shwe pen-o kehi thyü, ai ale nyun kebwen hyulo kemvui.

³Ale Sunggigü rüchün keshüka anyun kenjün thyüla; ale tha rüchün ntsun keshü ka, a shese la.

⁴A-le a no khensin chon bin; ale a nhokeli ri lao jozolo mvula.

⁵Ale gükela jon dan rüchün shü lo nduka gükela chen dan rüchünlo.

⁶Ale khejenyu tha rüchün ntsun sa tse gwünkho no gü; ale tha rüchün-o hihontse a npvü a ketso:

⁷“Npugü le a-zintse ngun kenila ti ole? A-le thame kae ngun shwipe a-kenyü nilo kemvui ole?

⁸A-le ngun somvu la se ole? A-johokeshü tsü then mvula se ole?

⁹Sunggigü le me shwikenjün tsü nmhin la se ole? Nyun kenta le a-le me shwi njün kehü bin khinlo la se ole?”

¹⁰Tsontseo ale, “A nthyü nnyü tsin kehü le higü hi-- Sunggigü le kvu mvu laso,” tsonzo.

¹¹Npugü ale n tho keda dan tsü rüchün hüti; ale gükela gwünkho ka nle ndun tho thyü keshü dan tsü rüchün shüti le.

¹²Nle thyükeshü dan rüla aphu ale rüchün tile; ntho kekvu dan tsü aphu ale rüchün ntsun shüti le.

¹³O Sunggigü, nle thalihi thyüshüe, tsüle nshün le. Tero nme-e n hontse gon mvu.

¹⁴Nle ndun tho dan thyüshü kehü Sunggigü le; nle nkekvu pe tsipwen dan hishü laso.

¹⁵N kekvunyu nle n temi dan kenilo, Jakob lo Josef tsipwen dan.

¹⁶Züdan le n hyu keshü ka, O Sunggigü, anyugun le nshvu la, lo züda kentsun dan-e nsü ndün la.

¹⁷N mhu dan le tsangkenri jashü, tsangpera le tsangneki chwiryü, lo lihizin aphu tsangkechwe shü.

¹⁸N tsangpera le chwiryü, lo tsangkekechwe le kazü ben la; kazü güle nsü ndün lo n nula.

¹⁹Nle zükentyü dan ge tsonchü; nle züda kentsun gü pfüthü tinla, ai n phanyu shvu hyumvu.

²⁰Nle Mosa lo Aaron au zen-o tanyü kekhwenyu nme hontse n temi tsonri hü.