Read Southern Rengma Naga LÜHIN 78 Bible Online

LÜHIN 78 - Southern Rengma Naga bible

LÜHIN 78

¹A temi dan, a senkethyü nyülo, lo ale nyu zoyo nnyun pe shülo.

²Ale jokejvü zoti lo gükela ka zokenjü jokentsun dan kon zokho shüti,

³tsüle n gun le nyü lo shalo kela, n gun pvübonyu le nka zoshükela dan.

⁴N gun le tsüdan tsüpe ngun nyenyu dan kebu la loho; n gun le ryü kejü shenhe ka Npugü kekvu lo a-tho keda dan, lo a-le thyü keshü ndun kethyü rüla pe zoshü ti.

⁵A-le tejvü gü pe Israel temi dan tsüshü lo johokeshü dan pe Jakob tsipwen dan tenyen shüla. A-le ngun pvübonyu dan no a-tejvü dan pe anyugun nyenyu dan senthyü shü lotse tenyen la,

⁶tson-o tsüsi shenhe gü no shalo-o pe anyugun nyenyu dan ka zoshülo nrün genyu.

⁷Hihontseo anyugun kono Sunggigü tenyen lo a-le nyu thyüshü yo tsü nmhinla mvule a-zintse a-johokeshü dan then ti.

⁸Anyu no anyugun pvübonyu hontse Sunggigü ge anyugun ketenyen tsekho lomvuo a-ntsun nren lo jozenkemvu lo tenyen lo kekünyu bin lomvu kela thyümvu nrün genyu.

⁹Efraim temi le tholevü lo levütsi pfüo teri kethyü jon nyü kehü tinla.

¹⁰Anyugun le Sunggigü zen kejozen kelo senbin lomvu laso; anyugun le a-tejvü zemvu letsela.

¹¹Anyugun le a-le nduntho thyükeshü, kehyu dantsü nmhin la.

¹²Anyugun pvübonyu dan le nri kebin ka, Sunggigü le Ijipt kazünyu Zoan ketejon ka ndun thodan thyüshü.

¹³A-le züda kenjünkho shüo tsünyu anyugun zen chwila; a-le züno sope kabon hontse thyüshü.

¹⁴Nhenyu nmhu lo khensin mah keben sen-o anyugun tsontsin.

¹⁵A-le kazü kesi günyu tsonye sükho shüo kentsun nyu züpe anyugun no tsü.

¹⁶A-le tsonye gü ge rünyu nme no chwiryü lo zü thyü pe no züri hontse tsunshü.

¹⁷Ai anyugun le Sunggigü mhundyü nyu kemu thyü hü gwünzin, lo kazükesi günyu anyugun le ketetso tsingü ntsun la.

¹⁸Anyugun le shweron thyü Sunggigü semeo anyugun le nnyü kebin ketyü ketsü hi.

¹⁹Anyugun le Sunggigü ntsun-o zo, “Sunggigü le kazü kesi nyu ketyü ketsü khishü logwa ti ole?

²⁰Ketsin a-le tso gü vükeshü ka züle tsun chwiryü züri thyü la; ai a-le tensü lo thyü we khipe a-temi dan tsü lo gwa ole?”

²¹Tsügenyu Npugü le anyugun khwenyü kelo ka a-nyunta la; tson-o a-le mah pe anyugun ro sola, lo anyugun ge a-nyun nta kenye la,

²²kechamvule anyugun le a-le anyugun kenilo titse a-gen anyugun ketenyen ndi kela genyu.

²³Ai a-le tsang tesoki zoshü lo tsüki kakhin dan khinsheshü lotse a-johoshü;

²⁴a-le anyugun no tyü nrün genyu manna nipe anyugun tsü lo tsangge shye pe anyugun tsüshü.

²⁵Tson-o anyugun le tsangge lokethyü nyu chvü tyü, lo Sunggigü le anyugun le lonyü kebin aphu pe anyugun tsü.

²⁶A-le npho kipon tsang no nbushü, lo a-kekvunyu tesin kipon tsangkenbu sü keyhun shü;

²⁷tson-o a-le tegü chon pe züda sege hachon hontse kethyü nipe a-temi dan tsüshü;

²⁸tsüle anyugun kensen bin lvünyu tsüryüo anyugun phika kehun aphunyu kesükela thyüla.

²⁹Tson-o temi dan le tyü ketegvülo; Sunggigü le anyugun le nnyü kebin tsü pe anyugun tsüshü.

³⁰Ai anyugun le tyüpe anyugun sülo mvuo tyü nsen kebinka,

³¹Sunggigü le anyugun ge a-nyunta lao Israel temi selo kegwa kenko tsin dan dushvu la.

³²Hihontse kebin pvünyue temi dan le kemu thyü bin gwünzin la; a-tho ndun kethyü le bin-e anyugun le tenyen lomvu la.

³³Tsügenyu a-le anyugun jon thyüpe kehenteshe nme hontse lo anyugun keyhun no whütse kenjün thyüo a-keni thyüla.

³⁴A-le anyugun peha dushvu kela ka a-sen dan le rani a-kiryüo; anyugun nyun kelu lo-o a-ka hi tenge hünyo.

³⁵Anyugun le Sunggigü le anyugun kentsen gü, lo kekvutsin güle ryü anyugun keche shühü tse rüchün lo hü.

³⁶Ai anyugun le zokeshü nme ketsin mvu.

³⁷Anyugun le anyu nyunketsin pe a-tsümvu; anyugun le a-zen kejozen kenjü tsü then ketsin thyü lomvu.

³⁸Ai Sunggigü le a-temi dan shwi njün sa. A-le anyugun nkela mvuo anyugun kemu jü pe tsü. Gwünkechon kie a-le anyunkenta sünila lo anyun kekhü kekheni lahü.

³⁹Ale anyugun le kesi thyümin, tsang kenhi le tinla lo rani ryühü kemvu hontse kethyü shabin.

⁴⁰Gwünkechon anyugun le kazü kesi günyu a-ntsun; gwün dikho ge anyugun le a-thyü pe no a-nyun gwamvula la!

⁴¹Anyugun le Sunggigü semen nini tse lo Israel kenshün Sunggigü nyunthyü nshvula.

⁴²Anygun le a-le anyugun shwikerüchün nyu ben nyu anyugun kenikelo jon gü lo a-kekvu kegwa tsü,

⁴³lo Ijipt kazü nyu Zoan ketejon ka a-tho kekvu ndunkethyü dan nmhinla.

⁴⁴A-le züri dan no tezi ngwa lao, Ijipt nyu no ketsü zü ndi la.

⁴⁵A-le tekhvü nipe anyugun dan nyu shüo no anyugun nthyü nnyü, lo tsegu dan no anyugun kazü nke la.

⁴⁶A-le tsekhvü dan nipe no anyugun lowpwen lowsha tyü lo anyugun low nke.

⁴⁷A-le tegwün no anyugun vain low nke lo khütso no anyugun kherobin dan nke.

⁴⁸A-le tegwün no anyugun methu dan jon lo tsangpera no anyugun senru dan shweshvu.

⁴⁹A-le anyun kenta lo anyun kekhü runpe anyu ge shüo anyugun no dyükezin thyü, tsü no kesi lothyü kehü hontse ryü.

⁵⁰A-le anyun kenta süni nmvue anyugun keyhun nrhoshvu mvu, ai kenpen pe anyugun boshvu la.

⁵¹A-le Ijipt nyu kakhwün aphu anyu peche nyuri gü dushvu küla.

⁵²Tson-o a-le tanyü kekhwenyu nme hontse a-temi dan tsonri lo tsontsin zen-o kazü kesi gü pfüthü chwila.

⁵³A-le anyugun tsonri kehü genyu anyugun le nshvu lamvu; ai züda güle anyugun shwikerüchün nyu dan kemihen la.

⁵⁴A-le anyugun zen ryü a-kazü kenshün, a-le lokelo kazü thun ge shü.

⁵⁵A-temi dan le kethün chwi keryüka a-le tsünyu keyhun nyu hüpe shwela; a-le anyugun kazü pe Israel tsipwen kenjünshü, lo anyugun ka khipe a-temi dan tsüla.

⁵⁶Ai anyugun le kekvutsin Sunggigü ntsun lo a-semen. Anyugun le a-johokeshü thyüzen mvu,

⁵⁷ai anyugun le anyu pvübonyu hontse a-ntsun lo a-jo lomvu, tholevütsi kekehun nme hontse tenyen lokü kemvu thyüla.

⁵⁸Bonyünyu kershvubin dan genyu a-nyun thyü nshvula, lo anyugun teromen dan genyu a-no a-nyunta sala.

⁵⁹Sunggigü le tsühyu keshü ka anyunta la, tsüngenyu a-le a-temi dan khenishü la.

⁶⁰A-le Shiloh nyu a-phika gü khela, tsüle a-le n gun dan nyu yhun kehü ka gü.

⁶¹A-le n gun shwikerüchün nyu no a-kekvu lo a-zan kechwi zansü gü Kejozenkelo Khinpha gü tsü lolo la.

⁶²A-le a-temi dan ge a-nyunta la tson-o anyugun shwikerüchün nyu no anyugun dushvu la.

⁶³Terinyu ponyu dan dushvu la, tsügenyu lünyu dan le temi nme ka kalu keloi ndi la.

⁶⁴Püshükeda nyu dan le zhethon ka sila, lo anyu nunyu no anyugun chechü mvu.

⁶⁵Kenkhin ki Npugü le jütseo chonso keryü hontse soryü; kenkonyu nme le zu genyu a-kenyü sa kebin hontse.

⁶⁶A-le a-shwikerüchün dan hü tesen pe kethonthen me jonpen mvukela keja kepfü nyu shüla.

⁶⁷Ai a-le Josef nyenyu dan kenila; lo Efraim kami gü kejü lomvu la.

⁶⁸Ai a-le Juda kami lo a-le sosa kehü Zion kazüthun kejü lo.

⁶⁹Tsünyu a-le tsangge a-ka hontse a-Kershvuka thyülo; a-le tsüthyü nko pe gwünkho aphu nyu binlo kegwa kazü gü hontse thyülo.

⁷⁰A-le a-gogü David kejü lo; a-le shai nyu a-khilo,

⁷¹tsügenyu a-le a-tanyü dan khwen kehü ka, a-khipe Israel raja, Sunggigü temi dan kekhwen gü thyüshü.

⁷²David le a-nyun njü lo a-da kegwa sen-o anyugun nucha lo tson rishü.