Read Southern Rengma Naga LÜHIN 79 Bible Online

LÜHIN 79 - Southern Rengma Naga bible

LÜHIN 79

¹O Sunggigü, bonyü nyu le n kazü nyu ryü laso. A-nyugun le n kenshün Kershvuka n rhula lo Jerusalem boren laso.

²Anyugun le n temi dan kesimin khipe güda chvüthyü lo n gonyu dan min khipe tehen thyü dan chvüthyü laso.

³Anyugun le n temi dan zi no zü hontse tsun; Jerusalem nyu bin aphu ka tezi le zü hontse tsun laso, lo temi nme no anyugun kesimin kesun ndi laso.

⁴A gun tekho kehun tsipwen dan no a gun nshwe; anyugun le a gun zope keyüthyü a gun shwinyü bin laso.

⁵Npugü, nle kethonthen a gun ge nyunta bin ti ole? N nyunkenta no mah hontse rozin bin ti ole?

⁶N nyunkekhü run pe n shakemvu tsipwen lo n ka hihü kemvu temi dan ge shüta.

⁷kechamvule anyugun le n temi dan dushvu la; anyugun le n kazü gü boren laso.

⁸A gun pvübonyu kemu dan genyu shaja pe agun tsü nyata. Ntsoka a gun shwi njün shülo; agun kenrin aphu nmhela sele.

⁹O Sunggigü, a gun cheshülo a gun kenishü ta; n zankechwi genyu a gun kemu jüshüo a gun kenishü ta.

¹⁰Nyuthyüo tsipwen dan no a gun ka, “Hagun Sunggigü le dikipon la?” tson shün mon. A gun no, n gonyu dan zi ketsun genyu nle shaja pe tsipwen dan ketsü hyu shülo.

¹¹Donyu le kenjünthyü sa kebin khwenyü shülo, lo nkekvu keda nyu no sila titse nmu kela dan tsü hoshülo.

¹²Npugü, tsipwen dan le n nshwe kethyü aphu genyu tsü jün tsenyü thyü pe anyugun ge shülo.

¹³Tsonyatselo, a gun n temi, lo n tanyü dan le kethonthen n cheno hüti lo ryükejü gwünkho aphu nyu nshwen hüti le.