Read Southern Rengma Naga LÜHIN 80 Bible Online

LÜHIN 80 - Southern Rengma Naga bible

LÜHIN 80

¹A gun khwenyü shülo, O Israel kekhwen gü; tanyü danme hontse nle Josef tsonri zen hü! Cherubin so rajakhün ge dun kebin gü,

²n npvü nkhipe Efraim, Benjamin lo Manasseh tsipwen hishülo. N kekvu pe a gun hishü; lo ryü a gun kenishü ta!

³O Sunggigü a gun thyü ngwani shülo! N shwikenjün pe a gun hishülo, lo a gun kenilo lati!

⁴O Npugü, kekvutsin Sunggigü, dithen laki nle n temi dan kehi gen nyunta bin ti ola?

⁵Nle nyungwakemvu pe a gun gin thyü, yhüphu zü honpen keda pe a gun la.

⁶Nle a gun hunpfü kebin tsipwen dan no a gun kazü genyu kega; a gun shwikerüchün nyu no a gun nshwe.

⁷Kekvutsin Sunggigü, a gun thyü ngwani shülo! N shwikenjün pe a gun hishülo, lo a gun kenilo lata!

⁸Nle Ijipt ki vain bin nme sen ryü; nle tsipwen kecha dan hüshwi lao tsü pe anyugun kazü nyu sen shü.

⁹Nle tsüno yhun titse bin nme ketsüshü; tsüle a-me tsen ntsun tsülo lo kazü gü apentha kesü thyüla.

¹⁰Tsüle a-shepe rinchothun dan hen lola; lo a-ro a-nyon le sedar binda dan sun lola.

¹¹A-ro le gun gü Mediterranean züda ti lo nithen ki gun gü Eufrates züri gü keti ki gun la.

¹²Nle nyuthyü le tseo chwi thyüpe hun kenjü tsü boren la ola? N tsoka we ligü higü tsü pfüthü kegü nyu le a-sha rühu lola gwaso;

¹³tehen nyu nyibon le tsü kedü la, lo tehen thyü le tsü tyü.

¹⁴Kekvutsin Sunggigü, rani a gun ki ryülo! Tsangge bin-o a gun nrishülo; tson-o ryü n temi dan kenishü ta!

¹⁵Ryüo nle senkeshü vain bin higü kenishü ta, vain bin bwe nle thyüpe no yhun nkosa kebin gü hi!

¹⁶A gun shwikerüchün nyu le mahpe tsü ro-o phün laso; n nyunkenta nyu anyugun nrishüo nkela lo!

¹⁷Nle kejü kelo n temi dan shwi ntsenlo lo, tsüle nle thyü nkosa keshü tsipwen gü.

¹⁸Tsonlo a gun le thame kae n kipon rani tinla loho; kerhün khipe a gun tsü ta, lo a gun le n shwen hüti.

¹⁹Kekvutsin Sunggigü, a gun thyü ngwani shüta. N shwikenjün pe a gun hishüta, lo a gun le kenilo lati.