Read Southern Rengma Naga LÜHIN 81 Bible Online

LÜHIN 81 - Southern Rengma Naga bible

LÜHIN 81

¹Shekerhün genyu nra tetso pe a kenko gü Sunggigü ki shülo; lü thyüpe Jakob Sunggigü shwen lo!

²Lü binzen lo lo lükhin vü lo; harp sen-o lüthyü nyun kenyü thyülo.

³Sheh shün lo sheh lvü nga genyu shukhun shülo.

⁴Hile Israel nyu jvü, Jakob Sunggigü le ahza khi keshü nme.

⁵A-le Ijipt kazü gü when kelo ka pe Israel nyu tsüshü. Ale shakemvu khwen nme nyü kelo le,

⁶“Ale nsüren ge n khvü penshe la; ale n no nkhvükensu penshe laso.

⁷Nle kenjün thyü kebin ka a koshü, lo ale n kenishü. A kebu bin tsangkenbu terhi nyu ale nkehi kenishü. Ale Meribah zükenthün ka nkegwa keshvu shwi laso.

⁸A temi dan ale hagun senkethyü khwen nyülo lo, Israel, ale n no akhwen nyüshü lo a kenyü ti!

⁹Nle thame kae tero kecha rüshvu nya.

¹⁰Ale hagun Npugü Sunggigü, Ijipt kazü nyu hagun zenchwi keryü gü le. N mün kvushülo ale n gin thyü shüti.

¹¹“Ai a temi dan le a khwen kenyüi mvu; Israel le ajo zen kemvui.

¹²Tson-o ale anyugun no nyunkerü nyu güo anyugun le nyuthyü nyü binyo thyülo lo tsela.

¹³A temi dan le a khwen nyülo a sherhün nrün; anyugun le a jozen lo ditsüki a kenyü nrün yo no!

¹⁴Ale anyugun shwikerüchün nyu nyeki kvu whütse lola njüo anyugun kenrhinyu aphu lolo lati ata le.

¹⁵Senyu le a ntsü hüyo tsünyu no nshvuo a mhundyü nyu nkhün tsüti; lo anyugun shaja le kethonthen bin ti.

¹⁶Ai ale thoshe ke gwatsin pe n gin thyüti lo tsonye gü ge khuzü pe n no tsü ketegvü ti.”