Read Southern Rengma Naga LÜHIN 83 Bible Online

LÜHIN 83 - Southern Rengma Naga bible

LÜHIN 83

¹O Sunggigü, nramvu bin nya; n tsema tse bin nya, nchen tse tinla nyata!

²Shwishü ta, n shwikerüchün nyu le kevükeben bin laso, lo n ntsü kehü dan le n ntsun soryü laso.

³Anyugun le kekebu ki n temi dan kentsun rhi bin nyo; anyugun le nle ntsen kehü dan ntsun-o tedo rhi bin nyo.

⁴Anyugun le, “Ryülo, n gun anyugun tsipwen nkela ti le, tson-o Israel hi kethonthen hi nmhin kela thyüla ti le nu,” tsonzo hünyo.

⁵Anyugun le tedo rhikelo ge tsü kejo rhünlo, lo n ntsun titse logwa nme thyülo:

⁶Edom lo Ishmael temi dan; Moab lo Hagrit temi dan;

⁷Gebal, Ammon lo Amalek temi, Filistia lo Tur temi dan.

⁸Assiria nyuko anyugun sin pe Lot tsipwen Ammon lo Moab temi dan logwa kenko hontse lo.

⁹Nle Midia nyu ge thyü keshü hontse anyugun ge thyüshülo, lo Kishon Züri nyu Sisera lo Jabin ge thyü keshü hontse.

¹⁰Nle Endor nyu anyugun so kvulo la, lo anyugun kesimin le kazü nyu tenla.

¹¹Nle Oreb lo Zeeb ge thyü keshü hontse anyugun sharhinyu ge thyü shülo; Zebah lo Zalmunna gen thyü keshü hontse anyugun so kekvu nyu so kvulo lo,

¹²anyugun le, “N gun Sunggigü kazü lope n gun hon thyülo tile nu,” tson hü.

¹³O Sunggigü, tsangkenbu le kenphü lo npen when pe shwen kela hontse anyugun no kezen lalo.

¹⁴Mah le chün ro kehü, lo mah kenyü le rincho ro kehü hontse,

¹⁵n tsangkenbu terhi no anyugun whün la lo n tsangkenbu no anyugun kerüla lo.

¹⁶O Npugü, keja kepfü pe anyugun jeh la, lo anyugun no n kekvu shalo.

¹⁷Anyugun no kvulo mvula lo kethonthen kershvula nda; anyugun no tetsin kepfünyu sila nda.

¹⁸Anyugun no n npvü Npugü letse shalo nda, kazü aphu so kekvukesen kedatsin gü.