Read Southern Rengma Naga LÜHIN 86 Bible Online

LÜHIN 86 - Southern Rengma Naga bible

LÜHIN 86

¹Npugü a khwen nyü shüo a kehi kenishü ta, kechamvule a keche ndi lo kvumvu le.

²Kesinyu a kenishü ta kechamvule ale njozen kehü genyu; n tenyen kehü n gogü kenishülo.

³Nle a Sunggigü le, tsügenyu a shwi njün shüta; ale jongwün nka hi hü nle.

⁴N gogü no a-kenyü lota, O Npugü, kechamvule a kehi le nki küryü kebin genyu.

⁵O Npugü, nle gwa lo a gun kemu jüshü hü, nle sozin kehü pe n kahi kehünyu kesükela thyü shü kehü genyu.

⁶O Npugü, a kehi nyüshü; ale nra-o nka keche kehi nyüshüta.

⁷Nle a kehi dan nyüshü kehü genyu, ale kenjün kethyü ka n kohü nle.

⁸O Npugü, n hontse kethyü tero nme ndi, nle thyü keshü hontse thyükelo nme ndi.

⁹Nle nyhun keshü tsipwen aphu ryüo nmhundyü nyu nrüshvu ti; anyugun le n keda shwenti.

¹⁰Nle kvusa lo ndun thodan thyü hünyo; Sunggigü le n nti.

¹¹O Npugü, a senthyü shüta, a no nketsin tson nyu gülo; lo anyun aphu sen-o nlo thyülo nrün genyu.

¹²O Npugü, a Sunggigü, ale anyun aphu pe nshwenti; lo ale kethonthen n keda rüla pe zohü ti.

¹³Nle a sozin kehü tsüle ditsüki gon la! Nle sika gü nyu a kenishü.

¹⁴O Sunggigü, ketekho kehü nyu le a nshwe soryü laso; rigwakemvu temi dan me le a dushvula titse nda hünyo- lo anyugun le n khwen nyü hümvu.

¹⁵Ai Npugü, n we keso lo shwikenjün Sunggigü, nle nnyunthon, meshwi njün lo joketsin senzin kehü gü.

¹⁶Rani ryüo a shwi njün shülo; a thyü nkvu shü lo a kenishü; kechamvule ale a jvü hontse n lothyü hünyo.

¹⁷Npugü, nle a cheshü lo anyun thyü nbwen shü kela a kenrhinyu dan no hyushüo kejala nrün genyu nkegwa zansü nme tsin shülo.