Read Southern Rengma Naga LÜHIN 88 Bible Online

LÜHIN 88 - Southern Rengma Naga bible

LÜHIN 88

¹O Npugü, a Sunggigü, a kenikelo gü, ale jongwün n ka keche hi, lo kheje nyu nmhundyü ka ryü hü nle.

²A kehi nyüshü ta; ale nrao kekeche kehi lo shüta!

³Kejün kethyü kechon a ge ryü laso, ale sigüjü la sele.

⁴Ale sigüjü kela nyu hontse laso; a kekvu ndi shüla sele.

⁵Ale mele khepe kesinyu dan nyu shü kela, dushvu pe sika nyuki keto kenjü, n ben nyu bin mvu kela genyu nle rüchün mvu kela nyu nme hontse laso.

⁶Nle a shwe pe sika kentsun nyu, kezüntsin lo kentsun tsinki shü laso.

⁷N nyun kekhü kensu le a ge bin, lo tsüle zükentyü hontse a minren laso.

⁸Nle apvünyu ju no a khela; a lope a-nyugun genyu kenrin tho nme thyü laso. A khinkhin lao ale tinchwi keloi mvu so;

⁹kenjün kethyü genyu a yhü le zün laso. O Npugü khenyütsen ale nko-o, a ben shwe pe nki shüo kehi thyü hü nle.

¹⁰Nle kesinyu genyu ndun tho thyü shü hü ole? A-nyugun le soryü nshwen hü ole?

¹¹Nle sozin kehü nmvue n joketsin kezo sika nyuki lo kenke bin nyu pe me tesha shü ti ole?

¹²N hon ndun kethyü dan tsü kezün bin nyu nmvue n kegwatsü nmhin kela kazü günyu shalo hü ole?

¹³O Npugü, ale nka keche hi hü nle; lonyütsen ale nka hi hünyo.

¹⁴O Npugü, nle nyuthyüo a kenila hü nla? Nle nyuthyüo a kebu tinla hü nla?

¹⁵A selo kanyu, ale kenjün thyüo sikesasa ryü; nle shaja pe a ketsü khvü kensu dan genyu a hokeli la sele.

¹⁶N nyunkekhü le a boren la; n kenrin kethyü le a when-o a nkela hü.

¹⁷Tsüdan le zükeda hontse jongwün a hunkenthün pfübin; anyugun le lizin hizin a khinthü shülo laso.

¹⁸Nle apvünyu a kho kenitsin jue no a khela; tson-o a zen kepvüshe kehü le kezün nti laso.