Read Southern Rengma Naga LÜHIN 89 Bible Online

LÜHIN 89 - Southern Rengma Naga bible

LÜHIN 89

¹O Npugü, ale kethonthen nle sozin kehü lüthyü ti; ale shenhe aphu ka n joketsin rüla pe zohü ti.

²Nle sozin kehü tsüle kethonthen bin ti; lo n joketsin tsüle tsang hontse binzin hüti tse kethyü ale sha bin nyon.

³Nle zoshü, “Ale kejü kelo temi gü zen-o kejozen laso; ale ago gü David ka swen-o a johoshü,

⁴‘N tsipwen no a-zintse raja thyüti; ale nkami no kethonthen kekvu sen hüti.’ ”

⁵O Npugü, tsang le n tho ndun kethyü dan shwen hü; lo kenshün nyu kehun günyu n joketsin shwen hünyo.

⁶Kechamvule Npugü, tsangge n hontse kethyü nme ndi; tsangge yhun kehü nyu nme nzen kendyü keloi ndi.

⁷Kenshün nyu kehun nyu n rühvu hü; anyungun aphu n nshvuo nmhundyü nyu sobin.

⁸Npugü, kekvutsin Sunggigü, nme n hontse kekvu ndi; tha aphu nyu tenyen lo kekü gü le nle, O Npugü.

⁹Nle züda kekvu gü so gon hü; nle zükentyü gwakemvu no ma tsela hü.

¹⁰Nle zürin gü Rahab boren lao dushvula; nle n kekvu sen-o n shwikerüchün nyu nyeki kvu lo laso.

¹¹Tsang lo kazü güe nhon; kazü gü lo tsünyu kebin aphu nle thyüshü.

¹²Tesogü lo tesin güe nle thyüshü; Tabor lo Hermon kazüthun le shekerhün thyü nzan shwen hünyo.

¹³Nle ditsüki kvuyo! N kekvu le ditsüki gon yo!

¹⁴Kemitsin lo kenjü le n rajakhün; sozin kehü lo joketsin le nmhundyü nyu hü.

¹⁵O Npugü, shekerhün lüthyü nrüshvu kehü nyu, n mhunkeben nyu tsonchü kehünyu le hen kegwanyu le.

¹⁶N genyu anyugun le jongwün shekerhün thyü lo n kemitsin genyu nshwen hünyo.

¹⁷Nle kvu kelo pe a gun tsü; n kesonyu nle a gun no kvulo hünyo.

¹⁸O Npugü, nle a gun keno kejü shü; Israel nyu Sunggigü kenshün gü, nle raja pe a gun tsü.

¹⁹Jonkethon gükela ki nle tseminki n go tenyenlo kekü dan ka zoshü, “Ale kekeche pe rihü a-zan kentsen nyu nme tsü laso; ale rajakhün khipe ale temi dan nyu kejü kelonyu nme tsü laso.

²⁰Ale kenshün terzü pe ago gü David yünshüo a-lope raja thyü laso.

²¹Tson-o a kenko no kethonthen a-zen hü, lo akekvu le a-thyü nkvu shüti.

²²Shwikerüchün nyu le a-nyeki kvu la loho; lo serikemvu gü no a-so kvula loho.

²³Ale a-shwikerüchün nyu dan boren lati lo a-kenrhinyu lihigü dushvula ti.

²⁴A joketsin kezo lo ale sozin kehü tsü no a-zen hüti; lo ale a-no a-zin kvulo hü ti.

²⁵Ale a-rajaphen thyü ngon pe Mediterranean züda ka gun gü Eufrates züri ti shüti.

²⁶A-le nra-o aka, ‘Nle apvü, a Sunggigü, a kenogü lo a kenikelo güle tsonti.’

²⁷Lo ale a-lope anyuri gü, kazü gü raja nyu dan nyu ketetso tsin gü thyü shüti.

²⁸Ale a-sozin kehü tsüno kethonthen binti, lo ale a-zen kejozenkelo gü tsüno nko binti.

²⁹A-kami no tsang le binzin kehü hontse kethonthen bin ti; lo a-tsipwen no azintse raja thyühü ti.

³⁰Ai a-nyenyu jule a tejvü gü khela lo a-johokeshü then mvula yatselo,

³¹a-nyugun le a-senkethyü jodan nyümvu, lo ale ahza khikeshü dan thyüzen mvula yatselo,

³²a-nyugun kemu genyu ale shaja pe tsüti; lo anyugun thyü kezü genyu anyugun no kenjün thyüti.

³³Ai ale David somvula loho, nmvue a-ka zo kenjü tsü khela loho.

³⁴Ale a-zen kejozen kenjü gütsü borho loha, nmvue a mün nyu chwikeryü jo gü kelu loho.

³⁵Kethonthen genyu gwüngwa ale azan kenshün sen-o swen laso; ale David sala loho.

³⁶A-tsipwen no kethonthen binti, lo yhüko le kebin then a-rajakhün le a mhundyü ka binti.

³⁷Tsüle sheh hontse kethonthen bin hüti; tsang dan le kebin then tsüle nnu mvu binti.”

³⁸Ai nle ntsoka we khela lo kenila, nle terzü pe yün kelogü ge nnyuntao a-ntsun laso.

³⁹Nle n gogü zen kejozenkelo gü borho la; lo a-raja perün pe nnyo kenphü nyu nrhu laso.

⁴⁰Nle a-chwida aphu boren la; a-ketechwen bin dan nke laso.

⁴¹Tsü nken kegü nyu aphu a-hon rühu hü; a-kajon nyu aphu a-shwinyü.

⁴²Nle kvukelo pe a-shwikerüchün nyu dan tsü; nle anyugun thyüpe anyu kenyü shü laso.

⁴³Nle a-teri kanyü thyüpe lihi kemvu thyüla, tson-o meno terinyu a-nyeki kvula.

⁴⁴Nle a-ben nyu rajathün khisen tinla, lo a-rajakhün shwe pe kazü nyu shü laso.

⁴⁵Nle a-selo jon dan thyü nzü la; nle keja kepfü pe aje laso.

⁴⁶Npugü, nle a-zintse kebu bin tile? Dithenlaki n nyunkekhü le mah hontse robin tila?

⁴⁷Rüchün shüta Npugü, a keyhun le dithenki züyo, nle a gun aphu no tenren kelai nyhun shü laso!

⁴⁸Temi segü le simvu tse yhun bin logwa la? Segü le sika kekvu günyu a-npvü a-kenilo gwala?

⁴⁹Npugü n keso pe hishü kerigü tsüle diki la? nle David ka n johokeshü tsüle dikipon bin nla?

⁵⁰O Npugü, rüchün shüta, dihontse mele n gogü nshwe bin yo! dihontse ale mele a swe ketsü aphu nyhen bin yo.

⁵¹O Npugü, n shwikerüchün dan le nle kejü kelo raja nshwe! A-le lihika güe anyugun le a-nshwe hü.

⁵²Kethonthen Npugü no jochü kepfü gü thyülo lo! Amen! Amen!