Read Southern Rengma Naga LÜHIN 9 Bible Online

LÜHIN 9 - Southern Rengma Naga bible

LÜHIN 9

¹Npugü, ale anyun aphu pe nshwe ti; Ale nle thyü keshü ndunkethyü dan aphu pe zoti.

²Ale n genyu nyun kenyü thyü lü thyüti. Ale lüthyü pe nshwe ti kekvutsin Sunggigü.

³N hyu keshü ka a shwikerüchün nyu dan le ranila ti; anyugun le chetsüo sila ti.

⁴Nle mejün kekera le kenjü lo ketsin, lo nle anopen-o ajünkera ti.

⁵Nle tenyenkemvu dan nmu laso lo serimvu kela dan nke laso; anyugun rüchün simvu lati.

⁶Agun shwikerüchünyu dan kethonthen nke laso; nle anyugun nyida dan nkela, lo anyugun nmhin shü la.

⁷Ai Npugü le kethonthen raja, a-le mejün kera nrün genyu a-rajakhün ndalo.

⁸A-le kentsen kenjü sen kazü gü so gon bin; a-le kenjü sen-o tsipwen dan jün kera hü.

⁹Npugü le mele nshwen kehünyu kesun gü, thyülo keshvu gwünkho ka n ntsen lo kehü bin nme.

¹⁰Npugü, n keshanyu le n tenyen ti; nle nki keryünyu nme-e khela hümvu

¹¹Lü thyüpe Npugü, Zion nyu keda thyü kebin gü ki shülo! Tsipwen dan ka a-le thyü keshü pe zo shülo!

¹²Sunggigü le kenjün thyü kebin nyu rüchün shü hünyo; a-le anyugun kechü khwen nmhin lamvu, lo a-le anyugun ge a-zü kemvu kethyü nyu shaja pe tsühü.

¹³A shwinjün shülo, O Npugü! A shwikerüchünyu genyu ale kenjünthyü kebin nri shüta! Kesinyu a kenishülo, O Npugü,

¹⁴tson-o ano Jerusalem temi dan mhundyü nyu so-o anyugun ka ale nshwe kehü rüla dan aphu pe z"oshülo nrün genyu. Nle a kenikelo genyu ale sherhün ti.

¹⁵Tenyen kemvunyu dan le chwe nme tsoshü-o tsünyu chetsüla; anyugun npvü anyugun sen nyu min laso.

¹⁶Npugü le kenjü nyu mejün kera kethyü ka a-npvü a-lope mehi shü, lo serikemvunyu danle anyugun npvü anyugun tho nyu anyugun minlaso.

¹⁷Serikemvunyu aphu, lo Sunggigü keni kelanyu aphu kesinyu gun lati.

¹⁸Kethonthen rhokedyünyu dan nmhin kela thyü loho, kendinyu kenrin no kethonthen kenrun thyü la loho.

¹⁹Ryülo, Npugü! temi no kvulo nya! Tenyenkemvu dan zen ryüo n mhundyü nyu anyugun jün kera lalo.

²⁰Anyugun thyü pe no nshvulo, O Npugü; temi dan thyü pe no anyugun le sikelai tse kethyü shalo lo.