Read Southern Rengma Naga LÜHIN 90 Bible Online

LÜHIN 90 - Southern Rengma Naga bible

LÜHIN 90

¹Npugü, shenhe aphu nyu nle a gun kehü bin thyü ryü.

²Nle kazüthun nmvue kazü rhenshü kemvu kanyu Sunggigü, lo nle nthenteyhün nyue Sunggigü thyü gun ti.

³Nle temi no ranio nyu pe a thyü shüyo tsü hontse lalo tseshü; nle a-no nnyo ngwa nila.

⁴Chen yie nme le nmhundyü ka khenyüme hontse; tsüle gükela le ndu hontse, nmvue tsüle kheje ki rikhun kelu gwa hontse le.

⁵Nle zükeda hontse temi kenyo pfü tinla, tsüle nmin nme hontse gwünzin,

⁶tsüle lonyü pun bin ai ngwünki rinlao rügu la hünyo.

⁷Kechamvule nnyunkenta ka a gun nkela; lo n nyunkekhü nyu a gun kerüshvu laso.

⁸Nle a gun kemu dan pe nmhundyü ka shü lola, a gun le kebuki kemu thyü kehü dan nle hyu bin.

⁹Kechamvule nnyunkenta genyu a gun keyhun jon le zü laso; a gun chen dan le henthügwa hontse laso.

¹⁰A gun keyhun jon le chen hentsenyü nmvue nko bin yatselo hentetse nti; ai tsüja katsü nyun gwakemvu lo kenjün kethyü kenchon; keyhun le whütse penla hü, lo agun le tin lahü.

¹¹Segü le nnyunkenta kekvu gü, lo n nyunkekhü le senryü nrün kenshvu gü shalo mon?

¹²A gun no pütsü lo nrün genyu, a gun keyhun le dithenki züyo pe a gun senthyü shüta.

¹³N nyunkenta le dikho thon npha tila? O Npugü n gonyu dan shwi njün shülo!

¹⁴Lonyütsen nle sozin kehü tsüpe a gun kesü thyü shüta, a gun no a gun yhunthen sherhün lo kenyü hülo nrün genyu.

¹⁵N le a gun nthyü nnyü kehü jon lo a gun le gwakemvu kehyu chen then laki a gun thyüpe a gun no a gun kenyü lota.

¹⁶N tha dan pe a gun n gonyu dan hishü ta; lo n kekvu zankechwi gü tsü a gun nyenyu dan no hyu shüta.

¹⁷Npugü a gun Sunggigü, n jochü no a gun zen binlo. A gun tha aphu no gwa lota.