Read Southern Rengma Naga LÜHIN 92 Bible Online

LÜHIN 92 - Southern Rengma Naga bible

LÜHIN 92

¹Chenkeno pe Npugü ketsü, lüthyü pe ketetsotsin gü keshwen le dihontse gwayo;

²tsüle lonyütsen nle sozinkehü, lo khejetsen n joketsin rüla zoshwi shü,

³lükhin a-ron kebin lo harp sen lüthyü kendyü shülo.

⁴Kechamvule, O Npugü, ntha le athyü pe a no a kenyü kelo genyu; nben tho dan genyu ale a sherhün-o lüthyü hünyo.

⁵O Npugü, ntho dan le ditsüki gonla! N kerüchün dan le ditsüki ntsun yo!

⁶Kepho gü le higü hi shalo ho, tha rüchün whü lohü kemvu gü le shakekho loho:

⁷Serikemvu güle tehen hontse yhun bin, lo gwakemvu thyükehü nyu le gwakenye bin-e, anyugun le nkeshü lati,

⁸ai Npugü, n we, kethonthen ketetso ki hünyo.

⁹Kechamvule Npugü, nshwikerüchün nyu dan le silati, lo serikemvunyu aphu kvulo mvu lati.

¹⁰Ai nle a thyü nko pe teronyugu kekvu hontse shü; nle shekerhün jochü pe atsüshü.

¹¹A yhütyü pe a shwikerüchün nyu le chekela hyu laso, anyetin pe gwakemvu thyü kehünyu le nke kela nyülo laso.

¹²Kemitsin nyu le palm bin hontse gwakenye loti; lo Lebanon nyu sedar sen hontse yhunti.

¹³Anyugun le Npugü ka nyu yhun kebin dan, Sunggigü Kershvuka günyu kebin hontse.

¹⁴anyugun le chün lae nsha ti, anyugun le nko lo a-nyüe jvüri tse binti.

¹⁵Hile Npugü le njü letse tsinshü bin, tsüle a keno gü ge a-zü kemvu ndi.