Read Southern Rengma Naga LÜHIN 94 Bible Online

LÜHIN 94 - Southern Rengma Naga bible

LÜHIN 94

¹O Npugü, khün zoshü kehü Sunggigü; Nle khün zoshü kehü Sunggigü le, ben chwiryü ta!

²Soryü ta, O Kazü gü jünkera kehü gü; ketekho kehü dan le hyulo kezü chün thyü pe tsülo!

³O Npugü, serikemvu güno dithen laki sherhün bin ti zun la?

⁴Thagwakemvu thyü kehü dan le dithenki ketekho lo anyutho gwakemvu genyu kemakhin bin tila?

⁵O Npugü, anyugun le n temi dan nkela lo nhon dan nshwe nyhün hünyo.

⁶Anyugun le maginyu lo tegonyu dushvu, lo tesin a gun kazünyu yhun kehü dan dushvu hü.

⁷Tson-o anyugun le, “Npugü le hyubin mvu; Israel Sunggigü le sha keloi mvu le tsezo bin hü nyo,” .

⁸Shakekho lota, O temi kepho tsin dan! Kepin gü, nle dicheki serilo tila?

⁹N gun nyetin thyü keshü Sunggigü le nyülo mvu ti ole? A-le ngun yhü thyüshü, a-le hyu loho ole?

¹⁰A-le senye dan senthyü hü a-le shaja pe anyugun tsümvu ti ole? A-le temi aphu senkethyü gü, a-le thame shamvu ole?

¹¹Npugü le temi kerüchün sha hünyon; anyu kerüchün le a-kenrun.

¹²O Npugü, nle nthyü nnyü shü kehü, lo n tejvü pe a-senthyü shü kehü güle a-hen kegwa nyu le.

¹³Serikemvu gü genyu tekhwün tso lo kemvu ka kenjün kethyü jon dan genyu kerüyü pe a-tsü kebin gwünzin.

¹⁴Kechamvule Npugü le a-temi dan khela loho; a-le a-hon dan kenila loho.

¹⁵Kenjü gü le kemitsin nyu ge rani ryüti, lo anyun nyu ketsin le kebin nyu aphu tsü then ti.

¹⁶Segü le a genyu soryüo serikemvu gü ntsun la? Segü le a kipon bin-o gwakemvu kethyü nyu ntsun la?

¹⁷Npugü le a keche kemvu we, ale kesi kazü ki whütse güla nrün.

¹⁸“Ale che kebin ka”; O Npugü, nle sozin kehü gü tsüle asü soshü le.

¹⁹Anyun nkhi sa kebin ka, nle anyunthyü n bwen pe a no a kenyülo.

²⁰keda serikemvu, lo njükemvu dan tejvü thyü kehü nyu le nzen kengü logwa ole?

²¹Anyugun le kengü lo njüo kemitsin gü ntsun, lo kemu kendi gü nmu pe no sila.

²²Ai Npugü le a chwida kenko gü thyü lola; lo a Sunngigü le a kesun tsonye gü le.

²³A-le anyugun serikemvu genyu shaja pe anyugun tsü, lo anyugun kemu genyu anyu nkela; Npugü ngun Sunggigü le anyugun nkela ti.