Read Southern Rengma Naga LÜHIN 96 Bible Online

LÜHIN 96 - Southern Rengma Naga bible

LÜHIN 96

¹O lü keshün thyü pe Npugü ki shülo! Kazü aphu lüthyü pe Npugü ki shülo!

²Lüthyü pe Npugü ki shülo, a-zan shwenlo! Khenyütsen a-le kenikelo rüla tsü zolo.

³Tsipwen dan ka a-zan kechwi rüla, lo temi aphu dan nyu a-tho ndunkethyü dan zoshülo.

⁴Npugü le gon, lo a-shwen sa zü; tero aphu nyeki a-nshvu kvu zü le.

⁵Kechamvule temi dan tero aphu thamen kezü nti; ai Npugü le tsang dan rhenshü.

⁶Teshwe lo terün le a-mhundyü nyu bin; kenko lo kezegwa le a-Kershvuka sübin.

⁷Kazünyu temi aphu, Npugü shwenlo; a-zankechwi lo a-kekvu shwenlo lo.

⁸Npugü zankechwi kethyü gü shwenlo; tha hokeshü sen-o a-Kershvuka nyu ryülo.

⁹Kenshün kezegwa nyu Npugü rüshvulo; kazü aphu a-mhundyü nyu ndün lo!

¹⁰Tsipwen dan ka, “Npugü le raja thyü bin, tse zoshülo! Ele, kazü gü thyülo laso, tsüle thame ka nnu la loho; a-le kenjü nyu temi jünkera ti.” tsezo shülo.

¹¹Tsang lo kazü sherhün lo; züda gü lo tsünyu kebin dan aphu nra n hyulo:

¹²low dan, lo tsünyu kebin lihi-e no sherhünlo! Chün nyu senbin dan aphu shekerhün khwen thyüti.

¹³Npugü le kazü so keda thyü keryü ka. A-le ketsin lo kenjü sen-o kazü temi so keda thyüti.