Read Southern Rengma Naga LÜHIN 97 Bible Online

LÜHIN 97 - Southern Rengma Naga bible

LÜHIN 97

¹Npugü le raja thyü bin! Kazü gü, sherhün lo! Zükehun kazü dan no a-kenyü lonu!

²Nmhu dan lo kezün le a-hunpfü bin; a-le kemitsin lo kenjü sen-o keda thyü bin.

³Mah le a-mhundyü nyu chwi gü a-temhun a-shwikerüchün nyu rola hü.

⁴A-tsangkekechwe dan le kazü gü ben shü; kazü gü le tsü hyushüo ndün la.

⁵Npugü mhundyü nyu kazüthun dan le khumen hontse zunla, kazü aphu Npugü mhundyü nyu.

⁶Tsang dan le a-kemitsin jün zoshü, lo temi aphu a-zankechwi kethyü hyu.

⁷Thamen kezü rüshvu kehü, teromen kezü a-kon kendi genyu ketekho kehü nyu aphu no keja pfüla ti; teronyu aphu a-mhundyü nyu nkhün-o rüshvulo.

⁸O Npugü, nle mejün kekera günyu Zion temi dan le a-kenyü lo Juda nyida dan le sherhün bin.

⁹O Npugü, kekvutsin gü; nle kazü aphu so keda gü; nle tero dan aphu so kedatsin gü.

¹⁰Npugü le gwakemvu ntsü kehünyu so hü; a-le a-temi dan keyhun ntsenshü hü; a-le serikemvu gü ben nyu tsüdan kenishü hünyo.

¹¹Keben le kemitsin nyu genyu ben chwiryülo, a-nyu kenjü nyu dan genyu shekerhün le bin nyo.

¹²O hagun kemitsin dan, Npugü nyu hagun sherhünlo lo chenkeno khipe a-zen kenshün gü ki shülo!