Read Southern Rengma Naga KESHAJO 1 Bible Online

KESHAJO 1 - Southern Rengma Naga bible

KESHAJO 1

¹Solomon, David nyugü, Israel raja gü thakesha jo:

²Temi no thakesha jo lo senkethyü jo kentsun dan shakekholo.

³Kemitsin, kenjü lo ketun kethyü thakesha senkethyü le kebin jodan lolo nrün genyu.

⁴Tson-o tharüchünlo kemvu gü no nyuyhünlo, lo selo ju no thasha lo kegwakeshvu rüchün kekholo.

⁵kensü güle nyülo-o shakenyelo, lo thasha kekho lo kehü güle a-do gwalo,

⁶thakesha jo lo jokejvü dan kon, lo kensü güle pe mekhen kehü dan sha kekholo hü.

⁷Npugü kenshvu le thakesha bin zen gü; ai kephonyu le kensü lo senkethyü jo lo hümvu.

⁸Anyugü, npvü le nsenkethyü nyülo, lo njvü le tha zo pe nkezen keni lanya.

⁹Tsüle njvü thyü ngwape n pe ge perün nme hontse lo tyü nme hontse ngwen kezegwa shüti.

¹⁰Anyugü, kemu nyu le nhüsü yatse-e njo shüya.

¹¹Keshanyu laka a-nyu gun le nka, “Je, ngun gü temi peha tsonkhwen-o dushvu tile, ngun kemu kendinyu tsonjwe tile!

¹²Sika hontse anyugun kerhün yünlo lati, anyugun no tekhwün künyu keyü hontse lati!

¹³Tsonya tselo ngun le kanyü a-min ketsen aphu hyuloti, lo mehon sekelo tsüpe ngun ka kesü thyülo gwa!

¹⁴Ryü ngun kengü lota, nyu rühu loyo tsüle ngun aphu kerhün hon thyü tile.”

¹⁵Anyugü, nle anyugun tsonnyu günya, anyugun tsonnyu npha sünilo.

¹⁶Kechamvule anyugun le gwakemvu tsonnyu gü hü, anyugun le whüwhütse me dukeshvu nda bin kehü genyu.

¹⁷Nle tün titse kebin tegü gü yhühyu ka joh süren pe a-nsen kebin tsüle thaja,

¹⁸ai temi tsüdan we anyugun npvü anyugun nsen kebin hontse, anyugun le anyugun sen nyu mi lati.

¹⁹Serikemvunyu kechwi hyulo kehünyu aphu a-tson le tsü hontse a-kenya tsüle kenya sen kebin gü keyhun sen tinla hünyo.

²⁰kensü le tsonda nyu nra sen hü, hakethyü binnyu tsügi le nra tetso bin,

²¹tsügi le chwida sogen nra sen, lo nyida gü khinrun ka bin-o:

²²“O kepho dan! Hagun le dithen ki pho bin tila? Dithen ki me shwinyü kehü dan le me shwikenyü le a-kenyü lo kepho dan le thashalo tila?

²³A senkethyü jo nyü kegwa thyülo; hire, ale akerüchün runpe hagun tsü tile; ale ajodan pe hagun hishü tile.

²⁴Ale hagun ko-e hagun le nyüshü mvula, ale aben shweshüe temi nme nri shümvula.

²⁵Hagun le ale hagun tsontsin keshü pe lihi kemvu hontsela lo a senkethyü jo nme lomvu kela genyu.

²⁶Ako hagun le kenjünthyü kelo ka adyügwa lati--

²⁷kenshvu le tsangkenbu terhi hontse lo kenkie le tsangkenbu zero nme hontse, kenjün kethyü nyugwa kemvu le hagun gen keryü ka.

²⁸Tsüka anyugun le ako soti, ai ale anyugun keni shü loha, anyugun le afü tserü soti, ai ahyu loha.

²⁹Anyugun le thakesha kenila, lo Npugü kenshvu gü kejü lomvu kela genyu.

³⁰Anyugun le a-le tsontsin keshü nme lomvu, lo a senkethyüjo aphu kenila.

³¹Tsügenyu anyu npvü anyugun thachün tyüti lo anyugun npvü tedo gwakemvu rhikelo pe anyu kesü thyüti.

³²Kechamvule kephonyu le a-le keni kela gütsü le a-dushvuti, lo kepho anyun nkhi kemvu gü tsüle anyugun nkie lati.

³³Ai ajonyü kehü güle gwakemvu kenshvu kendi nyu bwenye tse yhun loti.”