Read Southern Rengma Naga KESHAJO 10 Bible Online

KESHAJO 10 - Southern Rengma Naga bible

KESHAJO 10

¹Hidan hile Solomon thakeshajo: Nyu thakesha güle a-pvüno a-kenyü lohü, ai nyu kepho güle nyunkenjün kethyü senryü a-jvü tsü hünyo.

²Serikemvunyu hyukelo kenya tsüle agenyu tha kegwa nme thyü loha, ai kemitsin le kesinyu nkeni shüti.

³Npugü le kemitsin nyu no khün hü loha, ai a-le serikemvu güno a-kenyü gütsü hyu loha.

⁴Thathyükentsü genyu rhodyü hü, ai ketseri genyu nnyalo hünyo.

⁵Nyu tsangyün ka thakequen kelo güle thakeshanyu, ai nyun logvü ka zhübin kehü nyule keja kepfü senryü hü.

⁶Jochü le kemitsin nyu pe ge bin hü, ai kekega le serikemvu gü mün nyu bin hünyo.

⁷Kemitsin nyu rüla rüchün kelo le jochü nme, ai serikemvu nyu we nmhin lati.

⁸Anyun thakesha güle johokeshü dan rüchün loti, ai kepho jozo kehü güle nkie lati.

⁹Temi tsonchü njü kehü güle kenshvu kendi nyu gü loti, ai a-tson njü kemvu gü we mele a-shalo lati.

¹⁰Ketsin zomvu kela genyu kekevü le chwiryü hü, ai mhuntsun merho keshü gü le gwatha shü hünyo.

¹¹Kemitsin gü mün le kerhün zülvu nme, ai serikemvu gü mün nyu kekega le bin hünyo.

¹²Kekenrhi le kekega hüsü shühü, ai keso le thyü kezü aphu hen lahü.

¹³Tha shakekho lo kehü gü mün nyu kensü hyu lohü, ai kekevü le tharüchün lohü kemvu gü genyu.

¹⁴Kensü le tha shakekho lohü, ai kephonyu jo kezo ka kenkie sen ryü hü.

¹⁵Kenya le kenya gü ntsen lohü; rhokedyü le kendi nyu nkie la hünyo.

¹⁶Thakegwa thyü kehü chün le kerhün, ai kemu le tsontsin pe muchon lahü.

¹⁷Senkethyü jo nyü kehü güle kerhün tson gü nyu hünyo, ai mele a-rhokeshü nyühü kemvu güle tson gwünzü tin laso.

¹⁸Kenrhi kebu pfü kehü güle kenku nyu. Ligü higü sele thyü kehü nyu le kephonyu.

¹⁹Nle jozo chonlo, nle mu lalo kegwa le chonkvu. Nle metsa yatselo, nle matse binti.

²⁰Kemitsin nyu jole raka gi ketsin hontse; serikemvunyu kerüchün le a-min ndi.

²¹Kemitsinnyu mün le temi kechon ginthyü shühü, ai kepho gü we thasha kemvu genyu sila hünyo.

²²Npugü jochü le kenya senryü hü, lo a-le nyugwakemvu lope tsü sinshü hümvu.

²³Thathyü kezü tsüle kepho gü genyu kecho nme hontse, ai thasha kekho kehünyu we kensü le a-kenyü hünyo.

²⁴Serikemvu güle nyu nshvu hüyo tsüle a-gen ryüti, ai kemitsin gü we nyu lonyü binyo pe tsüti.

²⁵Tsangnbu keryü ka serikemvu nyu le bin sinmvu lati, ai kemitsin gü we kethonthen genyu binzen lo laso.

²⁶Thathyü kentsü güle a-nikeshü nyu gen, keshonzü pe n hü ka keshü, lo mah kekhu le nyhütyü ka keyü hontse la hünyo.

²⁷Npugü kenshvu le keyhun thyü nthon shühü, ai serikemvunyu keyhun chen we thyü nzü lati.

²⁸Kemitsin nyu kenrin le nyunkenyü, ai serikemvu nyu kenyü gü we a-kenrun thyü lati.

²⁹Npugü le kemitsin nyu ntsen hünyo, ai gwakemvu thyü kehünyu we nkie lati.

³⁰Thame kae kemitsin nyu khi ketu loha, ai serikemvu nyu we no kazünyu binmvu lati.

³¹Kemitsin gü mün le kensü sen chwiryü hü, ai gwakemvu kezo yigü we duthü lati.

³²Kemitsin gü le zokezü gü sha hünyo, ai serikemvu gü we a-zintse zozükemvu zo hünyo.