Read Southern Rengma Naga KESHAJO 11 Bible Online

KESHAJO 11 - Southern Rengma Naga bible

KESHAJO 11

¹Npugü le ketsin kemvu kesükü kesen nyu shwi ntsü, ai kenjü nyu süketun kethyü tsüle a-kenyü hü.

²Ketekho tselo keja pfü lahü. Ai kensü le tsenyo kehünyu zen hünyo.

³Kenjü nyule kentsenkeseri le a-tson tsin hü, ai temi gwakemvu nyu we a-serikemvu no a-nkie lati.

⁴Nyun kekhü jon gü nyü kenya le a-kechwi ndi, ai kemitsin le kesinyu nkeni shüti.

⁵Kenjü güle temi kegwa gü keyhun thyü rüyü shühü, ai serikemvu gü we a-npvü a-serikemvu nyu che lati.

⁶Kemitsin thole kenjü gü kenishüti, ai gwakemvu gü we a-npvü nnyü kehü gü no a-tenlo lati.

⁷Serikemvunyu nme le silo, a-kenrin ko a-zen-o sila hü, kenya tenye kebin tsüle kenrun thyüla hünyo.

⁸Kenjünkethyü nyu kemitsin gü kenishü lahü; lo serikemvu gü no a-sun thyü lahü.

⁹temi gwakemvu nyu le a-jo genyu a-kazonnyu nkie lati, ai kemitsinnyu thakesha nyu nkenishü hünyo.

¹⁰Kemitsin güle gwa kelo ka nyida güle shekerhün thyü hü, lo serikemvunyu le nkie kela ka mele shekerhün thyü sen sola hünyo.

¹¹Temi kenjü nyu jochü gü genyu nyida nme le a-zanchwi lohü; ai serikemvu gü jo genyu tsü nkie lahünyo.

¹²Thasha kemvunyu le a-kazon nyu nkhin hü, ai thakeshanyu we matse bin hünyo.

¹³Selü thyü kehünyu le kekebu jo zoshü lahü, ai temi tenyenlo kekü güle tsü kebu bin hünyo.

¹⁴Dika tson ketsin ndiyo, temi le chela hü, ai tson ketsin kechon le kebin ka kenshvu ndi.

¹⁵Keshanyuka nle tesin shakemvunyu nme pu kethun titse njo shülo, tsügenyu nle rünyumvu ti. Nle tsü kesükemvu güle ngenyu gwakvuti.

¹⁶Tenunyu me njün kehünyu le mele rühvu hü, ai tenunyu a-jvü gwakemvu nyu le keja pfülo hünyo. Temi thathyükentsü nyu le thame ka pisa hyu loha, ai tserütsera kehü nyu le nnya loti.

¹⁷Temi me njün kehü nyu le a-npvü kechwi hyu lohü, ai a-jvü gwa kemvu nyu le a-npvü a-nthyünnyü lo hünyo.

¹⁸Temi serikemvunyu le thame kechwi ndi, ai kemitsin tsin shü kehü nyu le a-chün hyulo tsentsü ti.

¹⁹Kemitsinnyu binzin kehü güle rhün loti, ai gwakemvu then kehü güle siti.

²⁰Npugü le gwakemvu rüchün kehünyu ntsü hü, ai kenjü gü thyü kehünyu so hünyo.

²¹Temi gwakemvunyu le shaja hyulomvu tse tinla loha tse shatsentsü binnyo, ai kemitsin dan we keni shüti.

²²Tenunyu kezegwa tha kegwakeshvu shakekho kemvu gile suna rin pe tebo hyikon ka keshü a-keme le.

²³Kemitsinnyu kenrin le thakegwa hyulohü, serikemvunyu kenyü güle nyunkekhü nyu.

²⁴Temi nme le kenrun nyu pe metsü mejün, tson-e nnya kenye bin, kechagü le metsü mvu lo keshvue ntsen hüe rhodyü gwünzin.

²⁵Nho kehü güle nnya kvuti lo zü pe ntsen kehü güle a-npvü a-ntsen loti.

²⁶A-shye ntsen lo kela gü mele swetsü hü, ai tsü jwe keshü gü ge jochü le bin hünyo.

²⁷Thakegwa fü tserü kehü güle kerühvu hyuloti, ai gwakemvu fü kehünyule tsüle a-gen ryüti.

²⁸A-npvü a-kenya tenyen kehü güle rügu lati, ai kemitsin güle jonyü kenjvü hontse bin ti.

²⁹A-kakhwün kevü kehü güle tsangkenbu gwenti, lo kepho gü le thakesha gü go thyüti.

³⁰Kemitsin gü rasha le kerhün senbin nme, ai tejvü zenkemvu le keyhun khisen tin lahünyo.

³¹Kemitsinnyu le kazünyu a-chün hyulo yatselo, serikemvu lo kemu gü we tsü nyeki ditsüki chon mon?