Read Southern Rengma Naga KESHAJO 12 Bible Online

KESHAJO 12 - Southern Rengma Naga bible

KESHAJO 12

¹Ligü higü thakesha le a-kenyü kehü nyu le a-le thyüzü kebin meno a-ka zoshü nyü hü, ai meno nrho keshü ntsü kehünyu le kephonyu.

²Temi kegwa nyu le Npugü kenyü pfülo hü, ai a-le thagwa kemvu rhi kehü nyu nmula hünyo.

³Temi le serikemvunyu a-binzen lo hümvu, ai kemitsinnyu temi le nnula loha.

⁴Nyeginyu kegwa le a-nyepvü perün, ai keja kepfü sen ryü kehü gü le a-ru nyuki ten kebin hontse.

⁵Kemitsin gü kerüchün le njü hü, ai serikemvu gü we mesa titse kehü gwünzin.

⁶Serikemvu gü jo le me zitsun titse hü, ai kemitsin gü mün le temi kenishü hünyo.

⁷Serikemvu nyu pe shwela lo ndi lahü, ai kemitsin gü ka güle bin loti.

⁸Temi nme le thasha yatselo tsügenyu mele a-shweti, ai anyun njün kemvu gü mele nkhin ti.

⁹Mizanyu nme thyüo nnpvü nhon tyü kebin güle kedanyu nme thyüo nnyo kehü gü nyeki gwakvu.

¹⁰Kemitsin nyu le a-senru phin rüchün hü, ai serikemvu gü le a-senrue shwi njün hümvu.

¹¹Kekvuthyü a-lonyu thathyü kehü güle ketyüketsü le kesü thyüti, ai temi kentsü kenthyü nyu sithen kehü nyu le a-nyun pfü kemvunyu.

¹²Serikemvu gü tsokhwe kenko le nren lati, ai kemitsin nyu le nnu loha.

¹³Serikemvu güle a-npvü a-jonyu min lola hü, ai kemitsin nyu le kenjün kethyü nrhi loti.

¹⁴Temi nme le a-jo genyu thakegwa pe a-kenyü thyü loti, lo temi bentha le a-npvü a-ki niryüti.

¹⁵Kephonyu le a-npvü a-le njü letse bin hü, ai thakesha nyu le mesen kethyü jo nyü hünyo.

¹⁶Kephonyu le mele a-nyun kenthün sha gwen tse lahü, ai keserinyu le mele a-nshwe-e kerüvü la hünyo.

¹⁷Joketsin kezo güle ketsin tsin zo shü hü, ai kenku jün kezo le mekesa jozo hünyo.

¹⁸Tharüchün mvuo jokezo le zhethon hontse mejün ntsun lahü, ai thakesha gü jole methyü ngwa shü hünyo.

¹⁹Joketsin kezo le kethonthen binti, ai kenku jo we keshanyu jaka nti.

²⁰Gwakemvu rhikehü nyu nyunka mekesa le binhü, ai thakegwa rhikehünyu nyunka shekerhün le bin hünyo.

²¹Thagwakemvu nme kemitsin nyu gen ryü loha, ai kenjün kethyü le serikemvunyu süpfü hüti.

²²Kenku mün le Npugü mhundyü nyu kentsü kenche, ai ketsin zo kehünyu le a-kenyü hünyo.

²³Temi keserinyu le a-thakesha kebu pfü bin hünyo, ai kepho gü le a-kepho pe me tesha bin hünyo.

²⁴Ketserinyu ben le mesa gonti, ai thathyü kentsü gü pie mego thyüti.

²⁵Nyunkenkhi le temi nme nyunka binlo a-mhun nsu lahü, ai jokegwa le a-thyüpe a-kenyü lo hünyo.

²⁶Kemitsinnyu le gwakemvu nyu rani tin lahü, ai serikemvu nyu tson gü le tsonri pe gwenzü la hünyo.

²⁷Thathyükentsü güle a-le hü kebin gü ten loha, ai keseri güle kenya a-min ketsen hyuloti.

²⁸Kemitsin tson güle kerhün, ai thyükezü tson güle tson tsin pe kesinyu shüla hünyo.