Read Southern Rengma Naga KESHAJO 13 Bible Online

KESHAJO 13 - Southern Rengma Naga bible

KESHAJO 13

¹Nyu thakesha güle a-pvü senkethyü nyü hü, ai me shwinyü kehü nyu güle mele a-senkethyü khwenyü hümvu.

²Temi kegwa güle a-jo genyu thakegwa tyüti, ai me kesa güle kekega nnyü bin hünyo.

³A-mün kekheni kehü güle a-keyhun ntsen lo hü, a-mün kvu pfü bin kehü güle kenkie hyulo hünyo.

⁴Thathyükentsü güle tyütsü nyüha bin-e thame hyulo ha, ketseri güle kenya hyusa loti.

⁵Kemitsin güle kenku ntsü hü, ai temi serikemvu güle keja kepfü lo tetsin kepfü tho thyü bin hünyo.

⁶Kentsenkeseri le a-tson njü kehünyu ntsen bin hü, ai kemu le serikemvunyu khipe shwe lati.

⁷Temi nme le nnyakebin rothyühü, tson-e thame ndi. Kecha nyu nme le kendinyu rothyü, tson-o nnya sabin hünyo.

⁸Kenyanyu nme le a-kenya pe a-keyhunron rhin hi lohü, ai temi nme-e kendi gü kedün bin mvu.

⁹Kemitsin gü mah le nnyü benchwü bin hü, ai serikemvu gü makenben we bokemhü lati.

¹⁰Ketekho kethyü genyu kenyilo hü, ai mele ntsenrokeshü lo kelo le thakesha.

¹¹Whütse hyukelo kenya le a-shvuthyü ndi lati, ai kesha shanyu kequen kelo güle chon kenye loti.

¹²N kenrin hyulomvu kela le nnyu gwamvu lahü, ai nkenyü hyulokela le kerhün senbin nme.

¹³Senkethyüjo nkhin la kehü güle kenkie senryü a-npvü a-gen shülo hünyo, ai johokeshü gü rühvu kehünyu le a-chün hyu loti.

¹⁴Thakesha gü senkethyü le kerhün zülvu nme le; nkeyhun le kenshvunyu kebin ka tsüle nche pe nno tsü nrhi loti.

¹⁵Tha shakekho lo kehü gü le me kenyü pfülo hü, ai tenyenlo kü kemvunyu le kenkie tson günyu hünyo.

¹⁶Keseri güle tha lihie sha kekho-o thathyü hü, ai kepho güle a-kepho pe mehi bin hünyo.

¹⁷Tenyenlo kü kemvu jolonyu le kekevü hüsü shühü, ai tenyenlo kegwa nyu le kengü kegwa senryü hünyo.

¹⁸Senkethyü pe lihikemvu thyü kela gü gen rhokedyü lo keja kepfü le ryü hü, ai mele a-senkethyü nyü kehünyu rühvu hünyo.

¹⁹Nle nnyü kebin gü hyukelo le gwasa; ai kephonyu le gwa kemvunyu rani lo nyü hümvu.

²⁰Thakeshanyu zen kengü kehü güle thashalo ti, ai kepho nyu zen kengü kehü güle nkie lati.

²¹Kenjün kethyü le kemunyu sithen hü, ai thakegwa pe kemitsinnyu chün thyü shüti.

²²Temi kegwanyu le a-kenya khepe a-nyenyu dan nyenyue tsü hünyo, ai kemunyu kenya we kequen pe kemitsinnyu tsü la hünyo.

²³Kendinyu genyu Ketyüketsü kechon hyulo kegwa kazü low tsü kemvu le bin, ai njün kemvunyu le tsü khinsenlo lae logwa.

²⁴Thün gü ntsen kehünyu le a-nyu ntsü hü, ai a-nyu so kehü güle a-senthyü pütsü lo hünyo.

²⁵Kemitsin gü le a-tyütsü kenyü tyütsü lo hü, ai serikemvu gü we nnyo bin hünyo.