Read Southern Rengma Naga KESHAJO 14 Bible Online

KESHAJO 14 - Southern Rengma Naga bible

KESHAJO 14

¹Tenunyu thakesha nyu le a-ka thyülo hü, ai kephonyu le a-npvü a-ben pe tsü borho la hünyo.

²Yhun njü kehü güle Npugü nshvu hü, ai yhun njü hükemvu güle a-ntsü hünyo.

³Kephonyu le a-ketekho genyu jozo chonsa hü, ai thakesha güle a-jonyu a-ntsen lo hünyo.

⁴Dika methutse ndiyo tsüka shye ndi, ai methutse kenko gü genyu shye le kesükela thyülo hünyo.

⁵Shahu tenyenlo kekü güle nku hümvu, ai shahu ketsin kemvu güle nku hünyo.

⁶A-npvü a-rüchün ngon kehü güle thakesha pfü ja thyü hü, ai tharüchün kekho kehünyu genyu we thakesha le nne sa.

⁷Kepho gü nrhila lo, kechamvule nle tsünyu thakesha jo nme-e nyü loha.

⁸Keseri gü thakesha le a-tson kegwakeshvu shahü, ai kepho gü kepho le a-sala hünyo.

⁹Kepho güle mu bin-e a-nyunkhi hümvu, ai temi kenjü güle a-kemu jülola nyü hünyo.

¹⁰Temi nyun güle a-npvü anyun kenjün kethyü sha binnyo lo tesin shakemvu nyu nme le a-zen-o a-shekerhün kenjün lo nrün ndi.

¹¹Serikemvu gü ka le nkie lati, ai njü kehü gü ka le gwa kenyeti.

¹²Temi mhundyü nyü njü kethyü tson nme le bin, ai tsü a-keni le kesinyu kegun tson.

¹³Nnyü kebin kae nyungwa kemvu le bin hü, lo shekerhün keni ki le nyungwa kemvu.

¹⁴Temi gwakemvu güle a-le nyuhyulo züyo tsü hyuloti, lo temi kegwa güle a-tha chün hyuloti.

¹⁵Tharüchün hü kemvu güle jo lihie tenyen hünyo, ai keserinyu le a-le dika gü zhü yo shwi pütsü hünyo.

¹⁶Thakesha güle pütsülo-o gwakemvu nrhilo hü, ai kepho güle a-kekheni lo mvuo whütse thathyü züla hünyo.

¹⁷Temi kenthün nyu le kemokennu tha thyühü, ai tharüchün kekho kehünyu le nyhen nhi hünyo.

¹⁸Tharüchün hü kemvu nyu le a-kepho chün hyuti, ai keseri nyule thakesha pe a-perün thyü loti.

¹⁹Temi gwakemvu güle kegwa gü mhundyü nyu nkhün tsüti, lo serikemvu güle kemitsin gü khenpvü nyu soti.

²⁰Kendi güle a-kazonnyu ai a-shwinyü mvu hü, ai kenya güle a-pvünyu kechon le bin hünyo.

²¹A-kazon gü nkhin kehü nyu le kemunyu, ai kendinyu njün kehü güle a-kenyü bin hünyo.

²²Gwakemvu rhikehü nyu le tson gwünzüla hümvu ole? Ai thakegwa rhikehü nyu le shwikenjün lo ketsin pe tsüti.

²³Thatho kethyü aphu kechwi le bin, ai me nthon kebin le rhodyü lo kehü gwünzin.

²⁴Thakesha gü perün le a-kenya, ai kepho güle a-kepho pe me no shalo kehü gwünzin.

²⁵Ketsin kezo shahu le me keyhun kenishü hü, ai kenku jozo keshü güle me bo nshvula hünyo.

²⁶Npugü kenshvu nyu temi le a-ketenyen nko lohü, lo anyenyu dan a-keno bin hyulo hünyo.

²⁷Npugü nshvu kelo le kerhün zülvu nme, tson-o temi le kesi sen gü nrhilo hünyo.

²⁸Temi danda le kebin nyu raja gü zankechwi le bin, ai temi kendi we raja le nkie laso.

²⁹A-nyun nta whütse hü kemvu tsüle tha shakekho kethyü keda le bin, ai a-nyunnta whütse kehü nyu le a-kepho thyü nsokeshü gwünzin.

³⁰Nyunkebwen le nthyümi thyü kesherhün shü hü, ai me shwi nyhükethyü le nru le tenla hünyo.

³¹Rhokedyünyu nme nshwe kehü tsüle a-thyükeshü gü nshwe hü, ai kendinyu njün kehü tsüle a-rühvü hünyo.

³²Serikemvu güle a-thogwakemvu nyu chelati, ai kemitsin güle a-thakegwa genyu a-no kekhin hyuloti.

³³Thakesha le tha shakekho kehünyu nyun nyu bin hü, ai kephonyu nyunka tsüsha hümvu.

³⁴Kemitsin le senye nme thyü ngon shühü, ai kemu le senye ligü higüe no keja kepfü thyüshü hünyo.

³⁵Raja güle tego thasha kehü gü shwi a-kenyü hü, ai a-nyunkekhü le keja kepfü tho thyü kehü gü gen ryüti.