Read Southern Rengma Naga KESHAJO 15 Bible Online

KESHAJO 15 - Southern Rengma Naga bible

KESHAJO 15

¹Bwenye tse mejo keni keshü ka nyunkenta le rani lahü, ai jokenko le menyun gwünkekhün shü hünyo.

²Thakeshanyu le thakeshajo zoshü hü, ai kephonyu mün le kepho henshwi shü hünyo.

³Npugü yhütyü le bin likahika bin-o kegwa güe lo keshvu güe nri binnyo.

⁴Jokegwa le kerhün sen bin nme, ai jogwa kemvu le nkapu boren la hünyo.

⁵Kephonyu le a-pvü senkethyü ntsü hü, ai senkethyüjo nyü lo kehünyu le keserinyu.

⁶Kemitsin gü kanyu kenya kechon le bin hü, ai serikemvu gü kechwi hyukelo le kenjün kethyü senryü hünyo.

⁷Thakesha gü mün le thakesha kenjün shühü, kepho gü nyun we tson shü hümvu.

⁸Serikemvunyu le kershvu thyü keshü le Npugü mhundyü nyu kentsü kenchen nme, ai temi kenjü nyu kehi le a-kenyü hünyo.

⁹Serikemvunyu tson le Npugü mhundyü nyu kentsü kenchen n me, ai a-le kemitsin then kehünyu so hünyo.

¹⁰Tson gwünzü kela nyu genyu shaja ketsen le bin; senkethyü ntsü kehü güle sila ti.

¹¹Kesinyu kazü lo tsünyu tero güe Npugü mhundyü nyu ndo bin yatselo dihontse temi le Sunggigü mhundyünyu a-kerüchün kebu lo tila?

¹²A-rüchün ngon kehünyu le meno a-senthyü nyü hümvu; a-le thakesha gü ki gü loha.

¹³Nyunkenyü le binlo nmhun ben lohü, ai nyungwakemvu le nkapu gü boren lahünyo.

¹⁴A-nyunki tharüchün kekho kehü nyu le thakesha pfü hü, ai kepho gü mün le thashakemvu pe süpfü hünyo.

¹⁵Kenjünthyü kehünyu jon dan le aphu gwakemvu nti, a-nyu nyü bin kehünyu genyu we kehothyü zin bin hünyo.

¹⁶Thakeshanyu sen-o Npugü nshvu kehü güle kenya kechon le bin-o kenjünthyü kebin nyeki gwakvu.

¹⁷Keso le kebin nyu henkenjvü nityü kebin güle kenrhio methutse gatyü kebin nyeki gwakvu.

¹⁸Temi kenthün nyu le kekega hüsü shühü, ai a-nyun kethon nyu le kengü kegwa senryü hünyo.

¹⁹Thathyü kentsü gü tson le tsehü le yhunhen lahü, ai kemitsin nyu tson le tsonda gü.

²⁰Nyu thakesha güle a-pvü no a-sherhün hü, ai temi kepho güle a-jvü ntsü hünyo.

²¹Tharüchün hü kemvu güle kepho le a-kenyü hü, ai thakeshanyu le nyu le njüyo tsü thyühü.

²²Kesenthyü kemvu we tharhi kebin dan thyüzü lahü, ai kesenthyü keshü kechon sen-o thathyülo hünyo.

²³Gwünkho toka jozokezü gü hyukelo le shekerhün dihontse kethyü nme la!

²⁴Thakeshanyu le tesinzin kesinyu kegun tson gü mvule tesozin kerhün nyu kegun tson nyu tsonchü hünyo.

²⁵Npugü le ketekho kehü gü ka sürhola hü, ai magi gü terhi thyü pe tsüti.

²⁶Serikemvu gü kerüchün dan le Npugü mhundyü nyu kentsü kenchen, ai kenshün gü jole a-kenyü hünyo.

²⁷Njükemvunyu kechwi tepen kehü güle a-kakhwün no kevü lohü, ai jweh ntsü kehü güle yhun loti.

²⁸Kemitsin güle dihontse mejo kenishü tiyo rüchün hü, ai serikemvu gü mün le gwakemvu jashü la hünyo.

²⁹Npugü le serikemvu nyu zen-o nithen, ai a-le kemitsin nyu kehi nyü bin hü.

³⁰Kenyü mhun le nthyü pe sherhün lohü, lo jolo kegwa le nthyü pe nsherhün kvu lohü.

³¹A-nyetin le kesenthyü jo kegwa dan nyülo kehü güle thakeshanyu dan nyu hüti.

³²Senkethyü jo nyünyü kemvu güle a-npvü a-ntsü hünyo, ai kesenthyü jo nyülo kehü güle thashakenye lo hünyo.

³³Npugü kenshvu gü tsüle thakesha kipon nsenthyü keshü gü, lo nnpvü nthyü tsenyo kelonyu le teshwe pfülo hünyo.