Read Southern Rengma Naga KESHAJO 16 Bible Online

KESHAJO 16 - Southern Rengma Naga bible

KESHAJO 16

¹Temi le a-nyunki tharhibin logwa, ai Npugü le a-no zo nrün jo tsü henshwi shü hünyo.

²Temi le a-mhundyü nyu a-jvü aphu nshün letse bin hü, ai Npugü le kapu gü kensu kenshen sü shwi hünyo.

³Ntho hope Npugü ki shüshü, tsonyatselo nle rhikebin gü thyü loti.

⁴Npugü le tha lihie a-kon kebin genyu thyüshü, serikemvu güe kenjün kethyü jon gü genyu thyüshü.

⁵Ligü higü ketekho kehünyu le Npugü mhundyü nyu kentsü kenchen; a-le shaja hyulo mvutse tinla loha, tse sha tsentsü lo.

⁶Ketsin lo joketsin nyu binlo, lo Sunggigü le nkemu jü shüti, Npugü jo zen lo, lo thagwakemvu nme ngen ryü loha.

⁷Npugü le temi nme jvü shwipe a-kenyü kelo ka, a-le a-shwikerüchün nyue thyüpe no a-zen kengü gwa lola hünyo.

⁸Kenjünyu thakeshanyu sen kebin le njükemvunyu thakechon sen kebin gü nye gwakvu.

⁹Temi nyun le a-tson dan rhibin hü, ai Npugü le a-kenkvü dan ketsen hünyo.

¹⁰Raja güle Sunggigü kekvu sen-o thazo hü; a-le jopen keshü tsüle a-zintse njü.

¹¹Npugü le kesükü lo kensu süketun kethyü tsüle a-kenyü hü, jola günyu kensu dan tsü aphu a-tho.

¹²Rajanyu le gwakemvu tsü nyhe bin loha, kenjü güle sorkari thyü n koshü kehü genyu.

¹³Raja le ketsin gütsü nyülo nyühü lo següle tsü zoyo shwi a-kenyü hünyo.

¹⁴Thakeshanyu le raja gü no a-kenyü bin titse nda hünyo; raja güle a-nyunnta loyatselo temi peha le sila logwa.

¹⁵Raja gü mhunkeben nyu kerhün le bin, lo a-le kenyükelo le tsenbwenka tsangri pfü ryü kehü nmhu hontse le.

¹⁶Thakesha hyukelo le suna nye gwakvu; raka nyeki thasha kekho kelo hyulo nrün gü kejülo.

¹⁷Temi kenjü nyu tsonlü güle gwakemvu nrhi kelo gü; a-tson shwi kelo güle a-keyhun ntsen lo hünyo.

¹⁸Ketekho le kenkie mhundyü ri ryühü, lo nrüchün ngon kethyü le chela nrün mhundyü ri ryü hünyo.

¹⁹Rhakedyü nyu zen-o nnyun tsenyo kebin güle ketekho kehünyu zen-o me nkie kelo kenjü kelo nye gwakvu.

²⁰A-senkethyüjo gü nyü kelo güle gwakenye loti; lo Npugü tenyen kehü güle a-henkegwa nyu.

²¹A-nyun nyu thakesha nyu tsüpe temi thakegwa keshvu sha kehü nyu le tse ko hü, lo jo kezegwa kezo le thasha kenye lo hünyo.

²²Thakesha le a-gen kebin nyule kerhün zülvu le bin, ai kephonyu senkethyü le gwünkho kenkie nti.

²³Thakeshanyu le rüchün shwi terio thazo hü, lo thakesha pe a-jo sinlo hünyo.

²⁴Jokegwa le khuzüka hontse, nkapu thyüpe n nyüh lo nphu thyü kesherhün lo hünyo.

²⁵Temi mhundyü ka njü kethyü tson nme le bin, ai tsü a-keni le kesinyu kegun tsonle.

²⁶Thathyü kehünyu tyütsükegwa tsüle a-thyüpe a-no thathyü nkokvu lohü, a-le tyütsü pe a-kenyü thyülo kenyü genyu.

²⁷Temi gwakemvu nyu le gwakemvu rhi hü, lo a-jo kezo le mah hontse mero hünyo.

²⁸Temi gwakemvu nyu le kekega tsi gwünshü hü, lo selü kethyü nyu nme le kepvüshe kehü sükhala hünyo.

²⁹Temi me nthyünnyü kehü nyu le a-kazon nyu nsü lo tsonri zen-o tsongwa kemvu nyu güla hünyo.

³⁰Temi a-yhütyü kemishüshü tse kebin gü tsüle mekesa rhi hü, lo a-mün thünvü kebin gü tsüle gwakemvu senryü la hünyo.

³¹Yhunkethon tsüle kemitsin nyu chün; pehü kepfü le zankechwi perün nme le.

³²N nyunnta whütse kemvu le kekvu gü nyeki gwakvu, lo a-npvü a-kekheni kelo le nyida nme lo kelo nyeki gwakvu.

³³Temi le Sunggigü kenda shalo titse henshwi hü, ai thyü shü nrün le Sunggigü nti.