Read Southern Rengma Naga KESHAJO 17 Bible Online

KESHAJO 17 - Southern Rengma Naga bible

KESHAJO 17

¹Nyun bwenye tseo chvü kesin tyü kebin güle ka nme nyu ho pe kesükela thyüo kega kebin gü nyeki gwakvu.

²Go thakesha güle nyu keja kepfü thyü kehü gü ketsen ti; lo tsasikezen nme hontse kenya a-jün hyu loti.

³Mah le suna lo rakagü kegwa keshvu shala hü, lo Sunggigü le temi nyun kegwa keshvu shwi hünyo.

⁴Gwakemvu thyü kehü nyu le serikemvu nyu jo nyü hü, lo kenku nyu le ketekho jo nyü hünyo.

⁵Kendi nyu shwinyü kehü güle, tsügü thyü keshü gü nshwe hünyo, mele hengwa kemvu teno kebin shwi a-kenyü kehü güle shaja hyu mvutse tinla loha.

⁶A-nyenyu nyenyu tsüle kethenyu perün, lo ntsenyu tsüle a-pvünyu zan kechwi le.

⁷Rühvukekü temi le kenku jozo hümvu, lo kepho nyu le a-mi kebin jo nme zo keloimvu.

⁸Jwe pe metsü keshü gü mhundyü ka tsüle temvu tso nme hontse; likahika güe tsüle thathyü kenye shü hünyo.

⁹Me thyükezü jüpe tsü kehü güle kengü kegwa fü hü, ai tsü thyü nini kehü gü kepvüshe bokha la hünyo.

¹⁰Gwüngwa thakeshanyu rhokeshü le gwüntsi gen kephonyu vükeshü nyeki ntsun la hünyo.

¹¹Temi gwakemvu nyu le mekenyhen tho nti fü hü, tsügenyu gwakemvu jolo nipe a-ntsun shüti.

¹²Kephonyu nme le nnu kebin teno kethyü nyeki thyügwen nmele a-nyu tünlo kela nme keteno we gwakvu.

¹³Temi nme le gwakemvu pe kegwa pu ketun yatselo, gwa kemvu le a-ka nkentin loha.

¹⁴Kekenyi le züphe shüo no tsun tin kejü hontse; tsügenyu kega soryü kemvu ka ntsema tin lalo.

¹⁵Serikemvunyu le njü letse kela gü lo kemitsin nyu nmu kela gü, kenyhun nren Npugü mhundyü nyu kentsü kenchen kethyü le a-keme.

¹⁶Kephonyu nme benka pisa le bin-o nyu kechwila, a-le tha rüchün lo shamvu yatselo tsüpe thakesha hilo gwa ole?

¹⁷Npvünyu le gwünkho aphu ka nso hü, lo rhokedyü ka keno no nrün genyu nsikezen gü n nyun lo.

¹⁸Temi a-ki a-nyun kendi güle a-jo hoshü lao mele tepu kepfü khvüpfü lola hünyo.

¹⁹Kemu sokehü güle kekega le a-kenyühü; a-ka khenpvü thyü ketetso kehü güle kerühunyu ko hünyo.

²⁰Temi a-nyun njü kemvu güle gwakenyelo hümvu, lo a-jo gwahü kemvu gü kenjün kethyü nyu chela hünyo.

²¹Nyu kepho gü apvü le a-nyu gwamvu hü, kephonyu a-pvü le shekerhün nme ndi.

²²Nnyun kenyü le dawa kegwa nme, ai dyükezin le nru thyü nsinla hünyo.

²³Temi gwakemvu nyu le jweh lolo njio kenjü gü nyu tha thyüshü mvula hünyo.

²⁴Temi tha shakekho kehü nyu mhun le thakesha nri bin hü, ai kephonyu yhütyü le lihikae nri bin hünyo.

²⁵Nyu kepho gü le a-pvü no a-nyun gwamvu hü, lo a-nnyu keshü gi no a-nyun kenjün thyüla hünyo.

²⁶Temi kemitsin nyu npu kethyü tsüle gwamvu; temi teshwe kepfü nyu vü kethyü tsüle a-zümvu.

²⁷A-jo süni kehü nyu le thakesha le bin, lo a-nyun kun kehü nyu le temi thasha kekho kehü nyu.

²⁸Kephonyu nme ai ntsema bin lo thakeshanyu letse rüchün hü, a-le a-mün kekü binlo thakesha nyu hontse bin hünyo.