Read Southern Rengma Naga KESHAJO 18 Bible Online

KESHAJO 18 - Southern Rengma Naga bible

KESHAJO 18

¹Me zen kengü lohü kemvu temi tsüle a-npvü a-jün kegwa nti fü kehü nyu; tson kehü nyu le ligü higü le kenjü gü shabin-e zen kenyunrhün lo hümvu.

²Kephonyu le thashalo nyüo fü hümvu, ai a-kerüchün gü nti zobin hünyo.

³Serikemvu le keryü ka, kenkhin ko ryü hü; lo zangwa kemvu le ryülo, keja kepfü ko ryü hünyo.

⁴Temi nme mün nyu jo le zü kentsun hontse; thakesha zülvu le züri tsun kebin nme le.

⁵Serikemvu nyu nme sokecha thyü keshü nmvue kemitsin gü kenjü khe kela tsüle gwamvu.

⁶Kephonyu mün le kekenyi sen ryühü, lo a-jo le a-kevü hilo hünyo.

⁷Kephonyu mün le a-npvü a-nkie lohü, lo a-jo nyu a-npvü a-milo la hünyo.

⁸Selü nyu jole ketyüketsü kegwa kun nme hontse; tsüle nmin nyuki yüla hünyo.

⁹Temi a-thonyu thathyü kentsü gü tsüle, a-nkie kehü a-sikezen güle.

¹⁰Npugü zan gü tsüle tsokhwe kenko nme, kemitsin nyu le tin gü tsü tesun lo hünyo.

¹¹Kenyanyu kenya le a-nyida kenko nme, lo chwida ketetso nme hontse a-sun bin hünyo.

¹²Kenkie mhundyü temi nyun le ketekho hü; ai tsenyo kethyü le teshwe mhundyü ri hünyo.

¹³Temi nme le nyülo ri mvuo mejo kenishü yatselo, tsüle a-kepho lo keja kepfü.

¹⁴Nle honyü kebin ka nle yhunnyü kebin gü tsüle ncheshü logwa, ai nle tsü nmhe layatselo, nkenrin kenkhin gü tsüle tin laso.

¹⁵Thakesha nyun le tha shakekho lo hü, lo thakeshanyu yhütin le thasha kekho kelo fü hünyo.

¹⁶Temi nme le kenrun nyu tha lope meketsü le a-genyu bin nda shü lo a-zenryü kedanyu mhundyü ka shüshü hünyo.

¹⁷Jokekera ka temi kecha nyu le ryü a-shün kemvu then a-rüla zoshü kerigü tsüle njü kethyü hontse hünyo.

¹⁸Temi kekvunyu mihvu le jokekera ka kenyi lola yatselo henkeshwi le au kekevü gü penla logwa.

¹⁹N sikezen gü le nchekeshü le nyida kenko nme hontse, ai kekega le tegiron pe khin kela hontse le.

²⁰Temi nme le a-jo nyu yhun loti; a-mün genyu a-le tyütsü a-kesü kethyü hyuloti.

²¹Kesi lo kerhün le n yi kekvunyu bin nyo; lo tsü so kehü nyule tsüsha tyüti.

²²A-nu hyukelo nyule thakegwa hyulo laso, lo Npugü kenyü pfülo hünyo.

²³Kendi nyu le mekenyü jozo hü, ai kenya nyule jokenko zo-o a-jo keni hünyo.

²⁴N pvünyu rothyüo npvünyu thyü kehünyu kobin hü, ai nsikezen gü nyeki nkho nni kehü npvünyu nme le bin nyo.