Read Southern Rengma Naga KESHAJO 19 Bible Online

KESHAJO 19 - Southern Rengma Naga bible

KESHAJO 19

¹Rhakedyü nyu joketsin zokehü güle a-jo njü hü kemvu kepho gü nye gwakvu.

²Tha shakekho mvutse thyünyü kethyü tsüle gwamvu, lo nyhun-o phashwe whütse kehü nyu a-tson gwünzü la hünyo.

³Temi le a-kepho genyu kenkie teno lolo Npugü gen a-nyun nta lola hünyo.

⁴Kenya le npvünyu keshün kechon zen ryü hü, ai kendi gü we a-pvünyu le a-khela hünyo.

⁵Kenku jünkezo güle a-shaja hyumvula loha, lo nku keshü güle tinla loha.

⁶Temi kechon le nhokehü nyu kenyü thyü titse fü hü, lo temi kenrun nyu thape metsü kehü gü pvünyu thyü hünyo.

⁷Kendi güle a-tsasikezen nyu aphu a-ntsü hü, tsonya tselo a-pvünyu le a-zen ditsüki nithen mon! A-le tsüdan then-o jvü bin-e hyulo ha.

⁸Thasha kelo nyule a-npvü a-so hü; lo tha shakekho kehünyu le gwakenye loti.

⁹Kenku jünkezo güle a-shaja hyumvu loha, lo nku keshü güle nkie lati.

¹⁰Kephonyu nme le yhun bwenye kebin tsüle a-ndyümvu, tsünye kie donyu nme no rajanyu sogon kebin le ndyü mvukvu.

¹¹Thakesha le temi thyüpe no a-nyunnta whütse mvu lahü, lo me thyükezü hyue hyukemvu hontse kela tsüle a-zan kechwi.

¹²Raja gü nyunkekhü le shünyho nme kenho hontse, ai a-le me shwi a-kenyü kethyü le tehen sogen khezü hontse le.

¹³Nyu kepho güle a-pvü kenkie, lo a-nunyu rho bingwünzin kehü güle tsangri thümvu shü kela keme.

¹⁴Ka lo kenya le Npvübon nyu hon gwenlo hü, ai nnu keseri gi we Npugü le khi keshü le.

¹⁵Thathyü kentsüle nthyüpe zhüsa tin lahü, lo thathyü kentsü nyu le nnyo hüti.

¹⁶Johokeshü ntsenkelo güle a-keyhun ntsen loti; ai jo gü nkhin kela güle siti.

¹⁷Kendinyu shwinjün shü kehü güle thape Npugü tepu hü, lo a-le tsügü thochün tsü ketun nishüti.

¹⁸Nnyu le ntsenyu thyüo thashalo kegwa gwünkho ka a-senthyüshü, kemvu we nne a-nyugun kechepe anyugun nkie kebin gwünzin.

¹⁹Temi a-nyunkenthün gwa kemvu le shaja hyuti; kechamvule nle a-keni shüe, nle tsü thyüni kethyüi genyu.

²⁰Nle hisiki thashalo nrün genyu mele senkethyü nyülo lo mele nkerhojo tsü lolo.

²¹Temi nyunki thakechon rhibin hü, ai Npugü le rhikeshü gütsü thyüloti.

²²Thaketepen le temi genyu keja kepfü nme; lo rhokedyü güle kenku gü nye gwakvu.

²³Npugü kenshvu le tsontsin pe kerhün nyu shühü; lo tsüle kebin güle ketegvü hü; gwakemvu le a-gwen la loha.

²⁴Temi peha we ntsü nthyü ritsin-o a-npvü a-chvüe pe a-mün ka shü ntsü hünyo.

²⁵Ketekho kehü gü vüshü, tson yatselo tharüchün lo sha hü kemvu nyu le seri loti; tha shakekho kehünyu kemu tsinpe hishü, lo a-le thasha kenye loti.

²⁶Temi a-pvü kesü lo a-jvü hüpe shwela kehü nyu güle keja kepfü lo tetsin kepfü senryü hünyo.

²⁷Anyu, thakeshajo gü gwünzü la kehü senkethyü tsü nyü nya gwünlo.

²⁸Dibin ka shahu nme le temi peha gen a-zükemvu thyü titse rhilo layo tsünyu kenjü ndi.

²⁹Ketekho kehünyu nmu la nrün, lo kepho gü süren vü nrün le binnyo.