Read Southern Rengma Naga KESHAJO 20 Bible Online

KESHAJO 20 - Southern Rengma Naga bible

KESHAJO 20

¹Zu le shwikenyü nme, Zu kekvu le methyü kelakelu kehü nme; lo ligü higü tsüno a-tsontsin züla kehü nyule thakeshanyu kemvu.

²Raja gü nyunkekhü kenshvu le shünyho le nho kebin kenshvu hontse; tsügenyu a-nyun thyü nshvu pe no a-nyunnta kebin güle a-npvü a-sithyü bin nyo.

³Mele kenyi kebin ka n npvü ntsema tin kela tsüle teshwe nme; ai kephonyu ligü higü kega bin hünyo.

⁴Thathyü ntsü ritsin kehü low ketsü gü gwünkho toka a-low phomvu kela güle thame kegvüi ndi lati.

⁵Temi nyunki temi kerüchün le zülvu kentsun nme nyu züle kebin hontse, ai tha shakekho kehü güle tsü thyüsen chwiryü lo hünyo.

⁶Temi kechon le a-npvü a-kegwa rüla zobin hü, ai segü le temi joketsin kezo nme hyulo tila?

⁷Temi kemitsin kenjü nyu yhun kehü güle a-siki a-nyenyu dan le jochü pfü loti!

⁸Raja nyu jokerakhün gen dun kebin güle a-yhütyü pe gwakemvu aphu whün la hünyo.

⁹Segü le, “Ale anyun thyü kenshün laso; ale a kemu nyu nshün laso, tsonzo lo gwa la?”

¹⁰Kensu-kenshe kesü lo thakendo hi kenyhun nren ka jo ketsin zokemvu tsüle Npugü mhundyü nyu kentsü kenchen le.

¹¹N tsenyue a-le thyü kebin nyu tsü a-le thyü kebin tsüle nshün lo njü le nmvuyo shalo la hünyo.

¹²Npugü le nyü kehü nyetin lo hyukehü yhütyü khipe n tsü shü laso.

¹³Nle tha rhodyüla lo keshvu genyu, kezhü nkenyü bin nya; nyhütyü koshü, lo nle ketyüketsü kesü kela le bin loti.

¹⁴Thahei kebin güle, tsüle gwamvu, a-min tsenri tson zo hünyo; ai tin lalo a-le mehatalo sele tse ketekho bin hünyo.

¹⁵Suna lo tso minketsen kesü kela thyü bin, ai thakesha jole hyutsensa kehü jewel a-min ketsen nme hontse le.

¹⁶Temi lihigü phori tsin-o tesin shahü kemvunyu nme tepu khvü pfü titse a-jo hokeshü güle a-npvü a-hon pe tsü kethun nrün le bin mvu loshvu.

¹⁷Mesao hyukelo tensü le nmün ka tyü gwasa, ai siki hachon le a-mün phin lati.

¹⁸Tharhi kegwathyü lo nrün tsüle nyuyhün kethyü gen bin; lo nda gwa sao gwün nda kelo genyu teri ka kvulo hünyo.

¹⁹Selü thyükehü güle kekebu jodan henshwi shü lahü; tsügenyu a-jo chonri kethyünyu zen kengü nya.

²⁰Temi nme le a-pvü a-jvü swentsü hü yatselo, kezün le keryü ka a-mah kenben le nmhü lati.

²¹Sokerika whütse hyukelo kenya tsüle kenkhin gwünki jochü pfü mvulati.

²²Mele gwakemvu thyü shülo, ale akhen zoti, tson nya; Npugü khwebin lo, lo a-le ncheshüti.

²³Ketsinnyu kensu sükemvu tsüle Npugü mhundyü ka kentsü kenchen nme, lo kesükü ketsin kemvu tsüle gwamvu.

²⁴Temi kenkvü le Npugü le nda shühü; tson yatselo dihontse temi le a-tson sha lomon?

²⁵Nle tha nme pe Sunggigü rüshvu titse njo shü kela mhundyü rüchün pütsü sashülo.

²⁶Thakesha raja güle segü le thyüzü binyo shalo lati, tson-o shwinjün mvutse shaja pe a-tsüti.

²⁷Temi kapu hile a-nyu ketsin ki tha aphu fü kehü Npugü mah keben güle.

²⁸Shwikenjün lo ketsin le Raja gü sen bin hü, lo kemitsin le a-rajakhün nmhu bin hünyo.

²⁹Selo zankechwi gü tsüle a-nyugun kenko kenki, ai kethennyu kezegwa güle a-nyugun pehü kepfü.

³⁰Njü keshüshvü tsüle gwakemvu thyü nshün lahü, vü keshü le nnyuki thyü kenshün la hünyo.