Read Southern Rengma Naga KESHAJO 21 Bible Online

KESHAJO 21 - Southern Rengma Naga bible

KESHAJO 21

¹Raja gü nyun le Npugü ben nyu züri nme; a-le tsü thyü kezepe lizin hizin a-kendo günyu shü hünyo.

²Temi le a-mhundyü nyu a-tha lihie njü letse bin hü, ai Npugü le shwibin hünyo.

³Nyurhün dushvu pe kershvu nyeki kemitsin lo kenjü kethyü güle Npugü le a-kenyü kvu.

⁴Kemakin lo ketekho nyun kepfü, kemu hidan hile serikemvu nyu tho.

⁵Pütsü satse tharhi kelo le kesükela thyülo tsentsü hü, ai nyhun-o thathyü kehünyu ligü higüe rhodyü lo hünyo.

⁶Kenkunyu kenya hyukelo tsüle tinla kehü makekhu nme lo kesishe nme le.

⁷Serikemvu nyudan nyunkenta tsüle anyugun shosen tin lati, anyugun le nyule njüyo tsü thyümvu kela genyu.

⁸Thyüzü kelanyu tson güle kehunkera, ai kenshün nyu jvü gü we njü.

⁹Ka kenmhun nme ka nnu ntü-nhi kethyü zenkebin gü mvule ka soki a-qün nme ka kebin güle gwakvu.

¹⁰Serikemvunyu le tha gwakemvu nnyü bin hü; a-mhundyü ka a-kazon kazin shwikenjün ndi.

¹¹Shaja pe ketekho kehünyu tsü keshüka, tharüchün shühü kemvu nyule thashalo hü; thakeshanyu nme senthyü shülo, a-le thasha kenye lo hünyo.

¹²Kemitsin nyule serikemvu nyu ka rüla rüchün bin hü; ai Sunggigü le serikemvu dan serikemvu tho genyu anyugun khipe shwela hünyo.

¹³Kendinyu kechükhwe nyüshümvu kehü güle a-npvü chüti tson-e a-khwe nyüshümvu lati.

¹⁴Kekebu ki kenrun nyu thape meketsü le nyunkenta thyü nbwen lahü; lo phisin ki jweh pe meketsü le nyunkekhü thyü nkun la hünyo.

¹⁵Kenjünyu thathyü keshü ka, kemitsin nyule a-sherhün hü, ai temi gwakemvu nyule a-shese la hünyo.

¹⁶Temi tha shakekho kelo tson gwünzü tinkela nyule kesinyu kehun nyu bin tinlati.

¹⁷Temi yhun ketegvü nyü kehü güle kendinyu nme thyüti; lo zu lo terzü le a-kenyü kehü güle nnya loha.

¹⁸Serikemvu güle kemitsin gü genyu, lo tenyen kemvu güle kenjü gü genyu phou kerho nme thyüti.

¹⁹Tenunyu ntü-nhi kethyü lo nyunkenthün gwakemvu nme zen kebin gümvu gü tehen yhunkemvu kazü nme ki yhun tinkela we gwakvu.

²⁰Thakeshanyu kehü binnyu kenya minketsen le bin hü, ai kepho güle tsü nkie la hünyo.

²¹Kemitsin lo shwikenjün then kehü güle kerhün lo teshwe hyuloti.

²²Thakeshanyu le kekvu nyu nyida kensu-kenshe shao anyugun le tenyenkebin chwida gü süshela hünyo.

²³A-mün lo a-yi kekheni lo kehü güle kenjün kethyü nyu a-ntsen lo hünyo.

²⁴Meta-megvüo, a-npvü a-rüchün ngon lo ketekho kethyü gü zan le me shwinyü kehü güle.

²⁵Thathyü kentsü güle a-ben pe thathyü kemvu genyu a-kenyü le a-dushvu hünyo.

²⁶Jongwün serikemvu güle tha tepen bin hü, ai kemitsin gü we khishü hü lo nho-o khishü hünyo.

²⁷Serikemvu gü kershvu le kentsü kenchen; a-le gwakemvu rüchün-o senryü lo ditsü lakhi ntsü nchen kvu tila.

²⁸Kenku jünkezo le ndi lati, ai nnyü kehü temi gü jo le bin loti.

²⁹Temi serikemvu nyule kemhunkvu hü, ai temi kenjü güle tha rüchün-o yhun hünyo.

³⁰Npugü le n ntsun so yatselo temi thakesha, shekegwa, kekokepe le ncheshü loha.

³¹Teri thyü nrün jon gü genyu keru nda njü, ai kvu kelo le Npugü hon.