Read Southern Rengma Naga KESHAJO 22 Bible Online

KESHAJO 22 - Southern Rengma Naga bible

KESHAJO 22

¹Kenya kechon nyeki zan kegwa gü kejülo, lo suna nmvue raka nyeki meso pfü kelo güle gwakvu.

²Kenya güe lo kendi güe hile kerhün; Npugü le anyugun aphu thyü keshü gü.

³Keseri nyule kenshvu le ryü kejü hyushüo a-kebu lola hü, ai tharüchün hü kemvu güle gü kenjün thyülo hünyo.

⁴Nthyü ketsenyo kelo lo Npugü kenshvu chün le kenya, teshwe lo kerhün.

⁵Njükemvu nyu tson nyu tsehü lo sen kethyü bin nyo; a-npvü a-rikhun kehü nyu le tsü zen-o nithen hüti.

⁶Ntsenyu senthyü pe a-no gümvulo keshvu tson günyu shülo, tson yatselo a-le püshü kelo ka tsünyu tinla loha.

⁷Kenya güle kendi gü sogon hü, lo tepukelo güle a-tepu keshü gü go.

⁸Njükemvu tsi gwünkeshü güle kenjün kethyü gvüti, lo a-le me nshwe kehü tsüle a-keni thyü lati.

⁹Nhokethyü yhütyü kebin güle jochü pfüti, a-le a-chvü pe kendi nyu zen kenjün kethyü genyu.

¹⁰Me shwinyü kehü gütsü hüshwi lalo, tson yatselo kekega ndi lati, lo kenyi kethyü lo khinyunyu kenshwe le bin mvu lati.

¹¹Nyun kenshün le a-kenyü kehü, lo shwikenjün jozo kehü güle raja gü pe a-pvügü thyülo ti.

¹²Npugü yhütyü le thasha kekho kethyü shwibin hü, ai a-le tenyenkemvu gü jodan khipe shwela hünyo.

¹³Thathyü kentsü güle, “Shünyho le tegwenki hünyo! Tsondanyu atünla loshvu,” tsonzo hünyo.

¹⁴Tenunyu keyüla nyu mün le tekhwünkü kentsun nme le, Npugü le a-gen a-nyunnta kela nyule tsünyu chelati.

¹⁵Ntsenyu nyunka serikemvu le bin hünyo, ai senkethyü thün gü tsüle hüpe nithen ki shüla hünyo.

¹⁶A-npvü nnya kenyelo titseo kendinyu nshwe nmvue tha pe kenyanyu tsü kehü güle rhodyü lo tsentsü ti.

¹⁷Nnyetin pfü kerüpe thakeshanyu senkethyü jodan nyülo, lo nnyun khinshe pe a-thakeshajo lolo,

¹⁸nle tsüpe nnyun ka shü pfülo yatselo nkenyü ho hüti, tsü aphu nmün nyu zoshwi lo nrün nda lolo.

¹⁹N ketenyen no Npugü gen binlo nrün genyu ale nthu tsüdan pe, nhyütyü, teshashü la sele.

²⁰Ale ngenyu senkethyüjo lo thakeshajo kon shenryü thushü laso,

²¹tsüle njü lo ketsinjo nno khipe me nipe nki keshünyu jo keni shü lo nrün genyu le.

²²Kendinyu hon selo lanya, a-le tha kendi genyu, nmvue jokera binnyu kenjünthyü kehünyu nshwe nya;

²³Npugü le anyugun nopenti, lo anyugun nkie kela dan keyhun nkie lati.

²⁴Temi kenthün nyu zen kepvüshe nya nmvue nyunkekhü gwakemvu nyu zen kengünya.

²⁵Nle a-jvü shalo njio, kelu nilo mvu lalo shvu.

²⁶Mekechanyu le tepu pfü kebin khvü pfü titse a-joshü kela nyu dannyu temi nme thyü nya.

²⁷Nle tha nme pe tho keloi ndi la yatselo anyugun le nhensinnyu kebin nzhüe sentin lati.

²⁸Nduka npvübon nyule kazürhi thyü kebin tsü bokela nya.

²⁹Nle temi a-thonyu a-dogwasa kehü nme hyule, a-le raja nyu lothyüti; a-le temi penyo nyu dan lothyü loha.