Read Southern Rengma Naga KESHAJO 23 Bible Online

KESHAJO 23 - Southern Rengma Naga bible

KESHAJO 23

¹Nle kedanyu nme zen-o tyütsü titse dun keloka, nyule nmhundyü ka binyo rüchün kegwa thyüshü.

²Keshanyu laka nle tha tyütsü gwaritsin hü yatselo nkekhe nilo.

³A-ketyü ketsü keyhün dan tsü tepen nya, tsüle mekesa chvü genyu.

⁴Nnyalo nrün genyu thathyü kenjün thyü nya; tsü khe kela jvü shalo ta.

⁵Nle tsü nri keshü ka, tsüle tin kela hyuloti; kechamvule tsüle a-sekin thyü whütse lo-o logi hontse nyeo tsangge külati.

⁶Kentukensü nyu chvütyünya; a-ketyüketsü keyhün tsü tepen nya.

⁷A-le, “Ryüo peha pe sin tyü lota,” tson zo bin hü, ai a-le tsüzobinmvu.

⁸Nle nyu tyülo yo tsü keso nishü lati, lo njo kezegwa kezo aphu pe nkie ja thyü lati.

⁹Kephonyu le a-khwenyü kebin ka jozo nyalo, a-le nthakesha jo nkhin kelai genyu.

¹⁰Ndukanyu kazürhi bokela nya nmvue tegonyu low talo lanya.

¹¹Kechamvule anyugun Rhinhikelo gü le kvusa, a-le anyugun nopen-o n ntsunti.

¹²N nyun pe senkethyüjo nyu shülo lo nyetin pe tha shakekho kelo jo nyülo.

¹³Ntsenyu senthyümvu kela thyünya; nle sento pe a-vü shü yatse-e a-le sila loha.

¹⁴Nle sento pie a-vüshü yatselo, nle kesinyu a-keni loti.

¹⁵Anyu, nle thakesha nyun pfü yatselo, ako akenyü loti.

¹⁶Nmün le nyule njüyo tsü zokeshü ka ale asherhünti.

¹⁷Kemunyu jvü shwipe nnyuntegi nya, ai jongwün Npugü kenshvu nyu binlo.

¹⁸Sidyü nme le bin ketsin, lo nkenrin gü ndila loha.

¹⁹Anyu, nyülo njio thashalota, lo nnyun no tson kenjü gü nyu bin lota.

²⁰Zutsü kvukerinyu dan nyu hünya, nmvue thyü tyü nyüritsin kethyü nyu zen kengünya.

²¹Kechamvule kenzeü nyu lo tha tyü nyüritsin kehü nyule rhodyü lati, lo temi tyütsü lo zhübin gwünzin kehü nyule phiren phiryü ben ti.

²²A-genyu nle yhun soryü kelo gü npvü khwenyülo, lo njvü le then lalo shwi ntsüla nya.

²³Ketsin gü heilo, lo tsü jweh lanya; thakesha, senkethyü lo thasha kekho kelo heilo.

²⁴Kemitsin gü a-pvü le a-sherhün sati; nyu kegwa nnyu keshü güle a-nyu genyu a-kenyüti.

²⁵Npvü lo njvü no ngenyu a-kenyü lo; lo nnyu keshü gi no a-sherhünlo.

²⁶Anyu, nnyun pe atsü shülo, lo nyhütyü pe atha ajvü dan nri shüta.

²⁷Kechamvule a-thyümi jweh kehü gile tekhwün kentsun nme le; lo tenu serikemvu gile zülvu kenrün nme le nye.

²⁸Tenu tsügi le mehon seketyü nyu hontse me khwe bin hü, tson-o pechenyu dan nyu ntsenserikemvu thyü nchon shü hünyo.

²⁹Segü le kenjün thyü bin nla? Segü le nyungwamvu bin nla? Segü le kega bin nla? Segü le kenya bin nla? Segü le a-kon kendinyu jünpfü bin nla? Segü le a-yhütyü nhon pfü bin nla? Zu khoka dunthon bin kehü nyu, zu kechacha pe keri kethyü fü kehü nyu le.

³¹Zu le nhon meri kela, honpen nyu nlvu shenshen tse kebin lo tson-o nyentsü kela tsü nri nya.

³²Kenkhin gwünki tsüle peri hontse nndu, lo zukeshonyu hontse ntsü shüti.

³³Tson-o nyhütyü le hyuhü kemvu dan hyu, lo nnyun le tharüchün ntsen lo mvuo njokezo le kevükeben chwiryü lati.

³⁴Nle züda nyu chwikeryü nyu nme hontse, lo züda kentyü ketetso sogen kehü hontse lati.

³⁵Nle, “Anyugun le akekhüshü,” ai avü nthyümvu; “Anyugun le avüshü, ai ale shamvu. Ale chon soryü lo yatselo, ale nigü tsüti,” tson zobin hünyo.