Read Southern Rengma Naga KESHAJO 24 Bible Online

KESHAJO 24 - Southern Rengma Naga bible

KESHAJO 24

¹Temi gwakemvu nyu shwi nyhüthyü nya, nmvue a-zen kengü nyü nya.

²Kechamvule anyugun nyun le thakenkie rhi hünyon, lo anyugun mün le me nthyünnyü nrün kenthon bin hünyon.

³Thakesha sen-o ka nme thyülo, lo thasha kekho kelo sen-o tsü bin zen lo laso.

⁴Thakesha genyu nkatsen le kenya a-min ketsen lo kezegwa aphu pe kesü thyü loti.

⁵Temi thakesha güle kenko gü nyeki kvu, lo kenkokenkin nyeki thasha kekho kelo le gwakvu.

⁶Kechamvule thakesha tson ketsin nyu nle teri thyü logwa, lo tharhi kegwa kechon le kebin nyu kvukelo le bin nyo.

⁷Kephonyu genyu thakesha le tetso ritsin; chwida ka mvulo keshvu kenthon kethyü ka a-le jozo lohümvu.

⁸Thagwa kemvu thyü titse rhizin kehü gü lope kekevü hüsü shü kehü güle tse ko hünyon.

⁹Kephonyu le rhikehü tsüle kemu, lo me shwinyü kehü gü tsüle temi mhundyü kentsü kenchen nme.

¹⁰Nle tha kerü nme teno kelo ka kvumvula hü yatselo nkekvu le rhori le.

¹¹A-zükemvu ka temi peha dushvu la titse kebin nyu kenishü titse kethyü kenyusun lanya.

¹²Keshanyu laka nle, “Agun le temi higü shakemvu le,” tsonya tselo, temi nyun nribin kehü güle tsü rüchünmvu ole? N keyhun ntsen bin kehü güle tsü shamvu bin ole? Lo a-le temi tha hontse a-chün thyüpe tsümvu ti ole?

¹³Anyu, khuzü tyüta, tsüle gwa kethyü genyu, lo khuzü ka tsüle nmün ka nyüle,

¹⁴thakesha le nkapu genyu tsühontse le tsekethyü shalo: Nle tsü hyulo lo, nsidyü nme le bin loti, lo nkenrin tsüle ndila loha.

¹⁵Temi serikemvu güle kemitsin nyu kebin bin whe titse khwekebin hontse nya; a-ka rhen gü nyalo.

¹⁶Kechamvule kemitsin güle gwün tsenyü gen chelae nisola hünyon; ai kenkie le ryüo serikemvu gü khipe shwe lati.

¹⁷N shwikerüchün nyu le chekela ka nsherhün nya, lo a-le a-pha nsükelo ka nnyunki nkenyü nya.

¹⁸Npugü le tsü hyu shüo, a-kenyü mvula, lo temi tsügü gen a-nyunkenta rani la lo keshvu genyu.

¹⁹Gwakemvu thyükehü nyu genyu nnyunkhi nya, lo serikemvu nyu shwi nyhüthyü lanya.

²⁰Kechamvule temi gwakemvu güle a-sidyü ndi; serikemvu gü makenben le nmhü lati.

²¹Anyu, Npugü lo raja gü nshvulo, lo au ligü higüe jo zenmvu lanya.

²²Kechamvule au kipon kenjün kethyü le whütse ryüti, lo segü le Npugü, nmvue raja gü le kenjün kethyü khishü nrün shabin ola?

²³Hidan hiko thakeshanyu le kezo jo: Jokera ka temi so ketunkemvu le gwamvu.

²⁴Temi serikemvunyu ka, “Nle thyü kezü ndile,” tsonzo keshü gü temi le a-swetsü lo a-shwi ntsüti.

²⁵Ai serikemvu nyu rhokeshü güle a-kenyü ti, lo jochü kegwa le a-gen binti.

²⁶Ai kenjü nyu jo kenito keshü güle kepvüshe ketsin zansü nme le.

²⁷Tegwenki ntha dan ndalo, low nyu n genyu thalihie nda küla, lo tson kela siki nka thyülo.

²⁸A-kon a-ni kendi ka nkazon nyu ntsun-o shahu thyü nya, nmvue a-rüla zonshvu nya.

²⁹“A-le a ge thyü keshü hontse a-gen thyü shüti! A-le thyü keshü genyu ale a-kethun niti,” tson zonya.

³⁰Ale temi thathyü kentsü, a-nyupfü hü kemvunyu nme vain low pfüthü gü laryü.

³¹Tsüle tsehü le yhunhen bula, tson-o tehen le süla, lo tsokhwe hun kenjü tsüko nna küla.

³²Ale tsü hyu shüo, tha nme rüchünlo, ale tsü shwishüo anpvü asenthyülo.

³³Zhü khelo, nngü gwalo, nben rüyü gwalo,

³⁴tson-o nle zhü ketseka rhokedyü le mehonseketyü nyu nme hontse lo thakendi le teri kanyü sen kehü nyu hontse ngen ryüla hünyon.