Read Southern Rengma Naga KESHAJO 25 Bible Online

KESHAJO 25 - Southern Rengma Naga bible

KESHAJO 25

¹Hidan hiko Juda raja gü Hezekiah temi dan le Solomon thakeshajo thu kelo.

²Tha kebu kenjü tsüle Sunggigü zankechwi, ai raja nyu zan kechwi güle tha fü sen chwikeryü gü.

³Tsang le ketetso genyu, lo kazü le kentsun genyu, tsühontse raja nyu kerüchün le shati loha.

⁴Rakagi gü gen kerhu khila lo, tson yatselo kecha güle thakhin nme thyü nrün kanyü le bin nyo.

⁵Raja gü mhundyü nyu serikemvu gü khi sen tinla lo, tson yatselo kemitsin nyu a-rajakhün thyüso loti.

⁶N npvü nkhipe raja gü mhundyü ka shü nmvue keda gü bin nyu sonya.

⁷Kechamvule raja gü mhundyü ka, “Hiki kü ryülo,” tson kezo le khishe kela nyeki gwakvu.

⁸Nyhütyü le nyuhyu shüyo whütse sen-o jokera bin nyu ryünya; kechamvule nkazon güle nkhipe keja pfüla lo nle kenkhin gwünki dihontse mon?

⁹N kazon gü hai npvü nrüla tsü kenthonla, lo kekebu jo kecha zoshwi nya.

¹⁰Nkhwenyü kebin güle keja kepfü pe ngen shü, tson-o ngwakemvu rüla le a-keni ndi lae shalo keho genyu.

¹¹Jo konme zoto keshü le suna ketepen nme pe rakagi gen dun kenjü hontse le.

¹²A-sisha kelanyu temi nme le pütsü lomvu lo keshvu jo pe a-khwenyünyü kebin nyu peha ka zokeshü le suna kenshün tsin pe rin nmvue tyü kecha nyeki a-mintsen kvu.

¹³Tenyenlo kekü lilo güle a-nikeshü gü genyu logvü tsang keyün gwünkho ka khetsozü kekun hontse le, a-le a-npugü gwün nrhün shü hünyo.

¹⁴Kenrun nyu thape metsü titse shüo khishühü kemvu nyu le tsangrishü kemvu khelukesü lo tsangkenbu hontse le.

¹⁵Nyhen-nhio kedanyu nme nishü logwa, lo jo kebwen nme le nru bose lati.

¹⁶Nle khuzü hyulo yatselo, ngenyu gwato nti tyülo, nle tyü rüche rilao nnyukeso shü lo keshvu genyu.

¹⁷N kazon nyu kanyu yüchonri tsinnya, a-le nzen kengü a-nyunphü lao nntsü lalo keshvu genyu.

¹⁸Temi a-kazon nyu gen kenku jünzo kehü nyu le terinyu senkehü senkethü, nmvue zhethon, nmvue tholevütsi kentsen hontse.

¹⁹Kenjün kethyü gwünkho ka joketsin zohükemvu nyu nme ketenyen le nhü gwakemvu pfüo thatyü kebin nmvue npha yünkela pfü tsonchü kebin hontse.

²⁰Temi nme le a-nyunkenjün thyü kebin ka lüthyü keshü le tsang kekun ka mephin yhünlo kela, lo keshonzü pe tejvünshvu ka keshü hontse le.

²¹N shwikerüchün nyu le nnyo bin yatselo chvüpe a-no tyülo, lo a-le teri bin yatselo züpe a-no tsülo.

²²Kechamvule nle mahgi khüpe a-pe ge shüti, lo Npugü le nchün thyü shüti.

²³Tesozin tsangkenbu le tsangkenri senryü kehü hontse selü le nyunkenta senryü la hünyo.

²⁴Tenunyu merhobin gwünzin kethyü nme zen-o ka kenmhun nme kenjün kebin gü nyeki ka soki aquen nme ka kebin gü we gwakvu.

²⁵Rünyi nithen nme ki jolokegwa shakelo le teri kebin nyu nme le zükun tsükelo hontse.

²⁶Kemitsin nyu nme le tsonpha pe serikemvu nyu tsü kela le zükenu le pen chwikeryü nmvue zülvu bokennu kela hontse.

²⁷Khuzü chonritsin ketyü le gwamvu, tsü hontse meno n nshwe kvuri titse kethyü le gwamvu.

²⁸Temi a-npvü a-nyunkenta kekhe nilo hükemvu nyule chwida kendi nyida mele hüla lo kegwa nme hontse.