Read Southern Rengma Naga KESHAJO 26 Bible Online

KESHAJO 26 - Southern Rengma Naga bible

KESHAJO 26

¹Tsangyün ka khetsa nmvue logvü ka tsangkenri hontse kephonyu nme teshwe kepfü le a-kezümvu.

²Ronyu nme le nye kehü hontse, lo sentu nme le shwa kehü hontse a-konkendi ka shochün le sun lo hümvu.

³Keru genyu kevü sento, gada genyu münkekhen lo kephonyu süren vünrün genyu thün nme le binnyo.

⁴Kephonyu nme kepho hontse a-jo kenishü nya, nko a-hontse lo keshvu genyu.

⁵Kephonyu jo hontse pe kepho gü jo kenishü lalo, a-le thakesha nyu nme letse rüchün bin lo shvu laryü.

⁶Kephonyu nme ben ka jolo nishü kehü güle a-npvü a-pha duthü lahü, lo kekevü hilo hünyo.

⁷Kephonyu mün ka thakeshajo le phayhon nyu nme pha le a-gen hüsü nshon kebin a-keme.

⁸Kephonyu nme shwekeshü le tso kejevü ka tso pe phin keshü hontse.

⁹Kepho nyu le thakeshajo kezo le kenzeü nyu nme le a-ben ge tsehü nme kha lati tse kebin hontse le.

¹⁰Kenzeü nyu nmvue tson nenyu teno kelo temi kepho jonshe sen kehü nyule tholevü kvupe temi lihigü junla kehü nyu hontse le.

¹¹Tehi nme le ranio a-npvü a-nyukeso ki nigü kehü hontse kephonyu nme le a-kepho nyu nigü bin hünyo.

¹²Nle temi nme le a-npvü a-le thasha letse kehü hyule? Tson yatselo a-nyeki kepho nyu we a-kenrin le binkvu laso.

¹³Thathyü kentsü nyule, “Tsonnyu shünyho nme le hü nle! Tsonda nyu shünyho nme le hünyo,” tsonzo bin hünyo.

¹⁴Kakhin le ranio a-sürhe gen gü kela hontse thathyü kentsü nyule a-zhü gen bin hünyo.

¹⁵Thathyü kentsü nyu le a-ben pe a-khun nyu thuphün lo njio, süso pe a-mün nyue shü ntsü hünyo.

¹⁶Thathyü kentsü güle a-npvü a-le tharüchün nyuyhün-o mejo kenishülo kegwa mitsenyü nyeki tha shakvu letse rüchün bin hünyo.

¹⁷Mele kegakebin n ge mvue gü hüsü kelo le tsonnyu tehi le tin kezhü a-nyetin sükelo hontse le.

¹⁸Kenunyu nme le mahsen, tholevütsi lo kesi shweshü kebin hontse,

¹⁹temi nme le a-kazon nyu sashüo, “A-le keyü thyü kebin gwünzin le,” tson kezo tsüle.

²⁰Tesen ndi lalo mah le nmhüla kehü hontse, dibin ka selü nyu ndi layo kega mvula hünyo.

²¹Mahgi pe ro n nyün lo tesen pe mah thyü n nyün kehü hontse temi kevüshü kehü nyu le kekega penso shü hünyo.

²²Selü nyu jole ketyü ketsü keyhün hontse; tsüle nnyun a-kentsun ki yüla hünyo.

²³A-nyun rhuo a-münki jokegwa zo kehü nyule rakagi pe nnyola jeh kenjü hontse le.

²⁴Me shwi ntsü kehü nyu le a-mün pe kerokon-o a-nyun nyu mekesa kebu pfü bin hünyo.

²⁵A-le jokegwa zobin-e a-tenyen nya; kechamvule kentsü kenchen kon tsenyü le a-nyun ka bin nyo.

²⁶A-le mesao me shwi kerüchün henpfü bin-e, süda kehun nyu a-serikemvu pe mehi lati.

²⁷Chwetso kehü güle tsünyu che lati, lo tso le ketoni-o keto keshü gü gen rani ryüti.

²⁸Kenku mün le tsügenyu kenjün thyü kelo nyu ntsü hü, lo kegwaro thyüo jokezo mün le kenkie thothyü hünyo.