Read Southern Rengma Naga KESHAJO 27 Bible Online

KESHAJO 27 - Southern Rengma Naga bible

KESHAJO 27

¹Nle sendu ki genyu ketekho nya, kechamvule jon me le nyu senryü tiyo nle shamvu.

²N npvü nshwe nyao, kechanyu no nshwe lota; n npvü nmün nyao, tesin nme no nshwelo.

³Tso le nsu, lo hachon le a-kensu le bin, ai kephonyu nyunkekhü le tsü kenyhun nren nye nsu kvu.

⁴Nyunkekhü le shwikenjün ndi, nyunkenta le kenrin; ai següle nyunketegi mhundyü ka sobin lotila?

⁵Ndo-o rhokeshü le kekebu ki so kethyü nye gwakvu.

⁶N pvünyu nme le nvü shüe kegwa genyu; ai n shwikerüchün nyule n nboshü yatselo pütsü lomvu loshvu.

⁷A-ginnyü kebin güle khuzüe tyümvu lahü, ai nnyo kebin gü we kekhü lihie nnyü hünyo.

⁸Temi le a-ka nken-o nmhontin kela le tegü nme le asüe nken-o nmhon tin kela hontse le.

⁹Terzü lo tha rünkegwa le nthyüpe nnyun nyü lo hü, ai kenjün kethyü le nnyun süren la hünyo.

¹⁰N pvünyu, lo npvü pvünyu khela nyalo; lo nle kenjün thyü kelo ka nsikezen gü ka ki günya. Nkazon gü nkhoka kebin gü le nithen ki kehü nsikezen gü nye gwakvu.

¹¹Thashalo, anyu, lo anyun thyüpe ano kenyülo, ano mele nnkhin kehünyu jo keni shülo nrün genyu.

¹²Temi keseri nyu le kenshvu le ryü kejü hyushüo a-npvü kebulo hü; ai kephonyu le gü teno lo-o kenjün thyü lo hünyo.

¹³Temi nme le tesin shahükemvunyu nme tepu khvu pfü titse a-johokeshü ka temi gü phi nme khilolo, lo tesin shahü kemvu gü genyu a-johokeshü le tse kethyü tsü sen binlo.

¹⁴Temi nme le lonyü nshwe soryü nra sen-o jochüpe akazon gü tsü yatselo, tsüle keswe kesü nme hontse lati.

¹⁵Ntsükerin ka tsangri thümvushü kethyü lo tenunyu kentükenhi nyu au keme.

¹⁶Tsügi kekheni kethyü le tsangkenbu kekheni kethyü nmvue nben nzhüzin terzü tejen sen kehü hontse.

¹⁷Tegi le tegiyi thyüshü hü, tsü hontse temi nme le kechagü gen a-yithyülo hünyo.

¹⁸Kherobin nkin kebin güle a-sha tyüti, tsü hontse a-npugü rikhun kehü güle teshwepfü loti.

¹⁹Zü nyu nmhun le nmhun teno nihü, tsühontse temi nyun le temi güle dihontse yo tsin pe hishü hünyo.

²⁰Mazi lo kenkie le thame kae sükela lo hümvu, tsü hontse temi tha ketepen yhütyü le gwaso tson hümvu.

²¹Mah pe suna raka kegwa keshvu sha lo hü tsühontse temi nme shwe keshüka a-kegwa keshvu shalo hünyo.

²²Nle kephonyu nme pe shye kesin-o penbin künyu shülo njio nibon pe dunbin-e a-kepho le a-gen tinkeloimvu.

²³Nthu n gün dan rüla shakegwa thyülo, lo nsenru dan ntsen kegwa thyülo.

²⁴Kechamvule kenya le kethonthen bin hümvu, lo rajaperün le shenhe aphu nyu bin gun hüle?

²⁵Tehen le ndi layatselo a-keshün le yhun nichwiryü hü, lo kazüthun ge tehen sen chwi keryü kequenlo,

²⁶tson-o tanyü dan le nphi nnya khishü ti, lo tenyü dan nlow min khi shü ti.

²⁷Tson-o tenyü nyüzü le ngenyu, lo nkami nyu genyu kesü thyü loti, lo ngogi dan kelei thyü loti.