Read Southern Rengma Naga KESHAJO 28 Bible Online

KESHAJO 28 - Southern Rengma Naga bible

KESHAJO 28

¹Serikemvu nyu le temi nme a-hümvue tin hünyo, ai kemitsin nyule shünyho hontse peche hünyo.

²Kazü nme le kemu thyüla yatselo, tsü güle keda nyu kechon le binti; ai thasha kekho kehü tharüchün lo kehü temi le tsüno kethon nko binlo hünyo.

³Kendinyu nme le kendinyu kenshwe le tsangri sa pe ketyüketsü nkie kela hontse.

⁴Tejvü zen hü kemvu nyule serikemvunyu shwe hünyo, ai tejvüzen kehü nyule tsüdan zen kenren bin hünyo.

⁵Temi gwakemvu nyule kenjü tsüle nyuyo shahü mvu, ai Npugü fükehü nyule tsüsha kegwa thyü binnyo.

⁶Joketsin kezo kendinyu nme le joketsin zohü kemvu kenyanyu nme nyeki gwakvu.

⁷Nyu thakesha güle tejvüzen hünyo, ai ketyü nyu dan zen kepvüshe kehü güle a-pvü no keja pfü hünyo.

⁸Kenya kechwi lo chonkenye titse mezen keyi kehü güle kendinyu shwinjün kehü gü genyu kequen hünyo.

⁹Temi nme le tejvü nyümvuo a-nyetin pfükerü laya tselo, a-kehi le kentsü kenchen nme.

¹⁰Temi kenjü nyu nme tsontsizü pe gwakemvu nyu shü kela güle a-npvü a-chwenyu chela ti; ai mukemvu güle thakegwa gwen loti.

¹¹Kenya nyule a-npvü a-le thasha letse bin hü, ai thasha kekho kehü kendinyu temi nme le a-le dihontse kethyünyuyo sha bin nyo.

¹²Kemitsin nyu nme le kvu lolo, temi le shekerhün thyühü, ai serikemvu nyule soryülo, temi le kebu tinla hünyo.

¹³Temi a-kemu kebu pfübin kehü güle gwakenye loha, ai zoshwi la lo thyüni mvula kehü güle shwikenjün hyulo ti.

¹⁴Azintse Npugü nshvu kehünyu le a-henkegwa nyu; ai a-nyun rükela güle kenkie nyu chela ti.

¹⁵Serikemvu nyu nme le kendinyu so raja kethyü le shünyho kenho nmvue thyügwen le mehü kebin hontse.

¹⁶Thasha kekho kemvunyu nme raja kethyü le me nshvu hü, ai njü kemvu ntsü kehü güle yhunthon loti.

¹⁷Temi dukeshvu kemu kethyü gü le nmhelo kegwathen nmheo a-npvü a-sika tso bin nyo. A-khinla titse ndo nyalo.

¹⁸Ketsin nyu tsonchü kehü güle keniloti, ai a-tson njü kemvu gü we chwe nme nyu chelati.

¹⁹A-kazü tsü kehü güle ketyüketsü le kesü kela thyüti, ai ntsenserikemvu nyu sithen kehü güwe rhodyü sati.

²⁰Temi joketsin kezo nyule jochü le a-kesü kela thyüti, ai nnya whütse lotitse kebin güle shaja hyumvutse tinla loha.

²¹Peha sokecha kethyü le gwamvu; ai tensü thün me genyu temi le thyüzü lati.

²²Kentu nyule rhokedyü le a-gen ryüti tse kethyü shamvuo cho-o kenya hü bin hünyo.

²³Temi merho keshü güle siki jokegwa zo-o mesa kehü gü nyeki mele mekenyü kvu kethyü hyu loti.

²⁴Temi a-pvü nmvue a-jvü hon selo la njio, tsüle kemu mvutse zo kehü nyu tsüle, me nkie kehünyu logwa le.

²⁵Tha ketepen nyule kega hüsü shühü, ai Npugü tenyen kehü güle nnya loti.

²⁶Temi a-npvü a-tenyen kehünyu le kephonyu le; ai thakeshanyu tsonchü kehü güle keniloti.

²⁷Thakhi pe kendinyu tsü kehü güle rhodyüla loha, ai tsüdan nrishü mvula kehü güle shochün kecha hyu loti.

²⁸Serikemvunyu le sokeryüka, temi le a-npvü kebu tinla hü, ai anyugun le nkie lalo kemitsin nyu le chon kenye lo hünyo.