Read Southern Rengma Naga KESHAJO 29 Bible Online

KESHAJO 29 - Southern Rengma Naga bible

KESHAJO 29

¹Temi a-senthyü shü shütse hüe a-nyu rükela nyule whütse nkie pe gwanilo keha thyü lati.

²Kemitsin nyule kekvu sen lolo temi le sherhün hü; ai serikemvu nyule keda thyü lolo temi le chüso la hünyo.

³Thakesha le a-kenyü kehü nyule a-pvü thyüpe no a-kenyü lohü, ai tenunyu a-thyümi jweh ketyünyu zen kengü kehü güle a-kenya nkiela hünyo.

⁴Raja güle kenjü nyu thathyü bin yatselo a-keda le nko bin hünyo, ai a-le raka nti rüchün güla lo a-kazü le nkie lati.

⁵A-kazon nyu sashü kehü güle a-npvü a-pha dyülo nrün sen nme thyü pe bin laso.

⁶Temi gwakemvu nyule a-kemu nyu a-nsen laso, ai kemitsin nyu le a-sherhün lo lüthyüzin hünyo.

⁷Temi kemitsin nyule kendinyu kenjün jvü shahü; ai serikemvu nyule thakesha tsühontse kethyü tsü shakekho lo hümvu.

⁸Temi ketekho nyule nyidae bokevü shü lahü, ai thakesha nyule nyunkekhü thunila hünyo.

⁹Thakeshanyu nme le kephonyu zen keyiso yatselo, kepho güle ntsema tse sun lo mvuo a-nyunthün lo shwinyü tinla hü nyo.

¹⁰Mezitsun nyü kehü nyule temi ketsin nyu ligü higü ntsü hü, ai kemitsin nyule temi tson kethyünyu keyhun ntsen hü nyo.

¹¹Kepho nyule anyunkenta aphu henshwi shüla hü, ai thakesha nyu le matse a-kekheni lola hünyo.

¹²Raja nyu nme le kenku jo nyü hü yatselo a-hensin kanyu aphu serikemvu nyu thyü lati.

¹³Kendi gü lo a-nshwe kehüe tha higü hile a-kenme Npugü le yhütyü pe au mihvu nren tsüshü.

¹⁴Raja nme le kenjü nyu kendinyu jün kerashü hü yatselo a-raja le kethon bin loti.

¹⁵Sento lo senkethyü le thakesha khishü hü, ai a-no a-keshathyü tin kela nyu güle kezha kepfü senryü a-jvü tsü hü nyo.

¹⁶Serikemvu nyule kekvu sen kelo ka kemu le chon kenye hü, ai kemitsin nyule yhun bin-o anyugun le chetsü kela hyu ti.

¹⁷Nnyu senthyülo, lo tson yatselo a-le nyun kebwen pe ntsü ti, tson-o nno nkenyü hüti.

¹⁸Dika tsemiki thakehyu ndi layo temi le nkiela hü, ai tejvü gü thyüzen kehü güle a-henkegwa nyule.

¹⁹Jo penyo le gonyu nme senthyülo nrün ndi, kechamvule a-le shabin-e nyüshü loha.

²⁰Nle tha rüchünshü mvutse jozo whüwhütse kehü nyu nme hyu le? A-nyeki kephonyu nme we a-kenrin le binkvu.

²¹A-go güle ntsenyu thyü ketse kanyu no a-keshakeni thyü kehü güle, kenkhin gwünki tsügü le a-kenya gwen kebin hyu loti.

²²Temi kenthün nyule kega hüsü shühü, lo a-nyun nta tin lakehü nyu le kemu kechon thyüla hünyo.

²³Ketekho le temi thyü tsenyo lahü, ai tsenyo kehü nyule teshwe hyuloti.

²⁴Kerühu nyu nme zen kerhün kehü güle a-npvü a-keyhun ntsü hü, a-le ketsin zoshülo shaja hyu loti, lo a-le zoshü mvulo Sunggigü le nyunkekhü pe a-tsüti.

²⁵Temi kenshvu le nnsen kenjü gwünzin, ai Npugü tenyen kehü güle keniloti.

²⁶Temi kechon le kedanyu kenyü fü hü, ai Npugü kipon temi le kenjü gütsü hyulo hünyo.

²⁷temi njükemvu nyule kemitsin nyu mhundyü nyu kentsü kenchen, ai a-tho njü kehü nyule serikemvu nyu mhundyü nyu kentsü kenchen le.