Read Southern Rengma Naga KESHAJO 3 Bible Online

KESHAJO 3 - Southern Rengma Naga bible

KESHAJO 3

¹Anyugü, a senkethyüjo nmhin lanya, ai nnyunnyu ale johokeshü dan sen bin lo.

²Tsüle yhunkethon lo kesü kela kethyü pe ntsüti.

³Keso lo ketsin no nkhe lanya. Tsüpe ngunda phin pfülo, tsühvu pe nnyun gen thu pfülo.

⁴Tsonlo yatselo nle Sunggigü lo temi mhundyü nyue keso lo teshwe pfü loti.

⁵Nnyun aphu sen Npugü tenyelo, lo nnpvü nthakesha tenye bin nya.

⁶Ntho aphunyu a-sha hülo, lo a-le ntson thyü kenjü shüti.

⁷N npvü nle thasha le tsenya, Npugü nshvulo, lo gwakemvu nyu ranilo.

⁸Tsüle n thyümi thyü kesherhün lo nru thyü nko shüti.

⁹N kenya lo nkalonyu nrasha keridan aphu sen-o Npugü rühvulo.

¹⁰Tson yatselo shye le nsüsen kesü thyü loti, lo vain züle ntsun pfükha ti.

¹¹Anyugü, Npugü le nno gwalo titse nsenkethyü ntsüla nya, lo a-le nkesü kethyüka tsü nnyu tsemi lanya.

¹²Kechamvule Npugü le me pvünyu le a-nyun a-kenyünyu senthyü kehü hontse a-sonyu senthyü kehü genyu.

¹³Kensü lo tha shakekho kelo hyu kelo güle a-yhen kegwanyu.

¹⁴Kechamvule tsünyu kechwi le raka nyeki gwa lo suna nyeki a-minle bin kvu.

¹⁵Kensü le rubie nyeki a-mintsen kvu, lo nle tepen kehü nme pe tsü kendyü keloimvu.

¹⁶Yhun kethon le tsügi ben njüzin bin, kenya lo kerhvu le a-ngwa zin binnyo.

¹⁷Kensü tson le nyunkenyü, lo a-tson aphu nyu nyunkebwen le binnyo.

¹⁸Thashakelo nyu le a-yhen kegwa nyu; kensü le kerhün pe anyugun tsüti.

¹⁹Npugü le a-kensü nyu kazü gü thyü shü; a-le atha keshanyu tsang pe a-bin ka shü shü.

²⁰A-thakeshanyu züri no tsun chwiryü lo nmhu no tsang kenri khipe kazü gü tsüshü.

²¹Anyugü, kensü lo tha shakekho kelo tsü ntsen kegwa thyülo, tsü no ngen tin lanya.

²²Tsüle n keyhun nyu n nyunkenyü lo yhen kegwa khishüti.

²³Tson-o nle kenshvu nditse ntsonyu gun loti lo npha nsüla loha.

²⁴Nle dun tsüe nshvu loha, lo nle zhü ketsü ka zhü bwenye loti.

²⁵Kenshvu le tsangkenbu terhu nme hontse whütse serikemvu gü gen ryü kehü tsü rüchün nnyun le ho loha.

²⁶Npugü le nntsen loti. A-le nno mesen nyu minla loha.

²⁷Lihi gwünkho kae thyülo kegwa le nbennyu bin lo mvuloshvu kebin nyu keche shülo.

²⁸Nle ntsoka nkazon gü keche shülo kegwa le bin yatselo khwetselo, senduki ti tson zo nya.

²⁹Ntenyen ngwao nkhoka kebin nkazon gü gen thagwakemvu rhi nya.

³⁰Mele ngen a-zükemvu thyümvu yatselo a-kon kendi ka me nmu nya.

³¹Me nkie kehü nyu shwi n yhüthyü nya, nmvue a-nyutha hontsenya.

³²Npugü le temi gwakemvu thyü kehü nyu ntsü, ai a-le kemitsin nyu rüchün ngwa kehü genyu.

³³Npugü shochün le serikemvu gü kanyu bin hü, ai a-le jo chü pe kemitsin nyu kebin bin nyu shühü.

³⁴A-le me shwinyü kehü dan shwinyü hü, ai tsenyo kehü nyu shwinjün shü hünyo.

³⁵Thakesha güle teshwe pfüti, ai kepho gü we keja kepfü hyu loti.