Read Southern Rengma Naga KESHAJO 30 Bible Online

KESHAJO 30 - Southern Rengma Naga bible

KESHAJO 30

¹Temi güle pe Ithiel, Ithiel lo Acal au kazo:

²Ale temi nme letse kethyü ale phori ketsin laso; ale temi thakesha kerüchün le agen ndile.

³Ale thashae lomvu nmvue Sunggigü rüla shamvu shü.

⁴Segü le tsangge küla lo tsenryü ola? Segü le a-jenthün nyu tsangkenbu tejen sen binlo la? Segü le phi nme nyu züjeh senlo la? Segü le kazü keniketi thyü shüla? A-zan le segü lo a-nyu gü zan le segü la? Ketsin hagun le sha bin nyo.

⁵“Sunggigü jole aphu ketsin; a-le nrhoshü lo a-tenyen kehü nyu dan kesun güle.

⁶A-le zokemvu jope a-jo sinya, a-le nrhoshüo nkenku hyulo lalo keshvu genyu.”

⁷Ale tha konhvu nka hibin nle; ale sikemvu ka a no hyu lota.

⁸Kenku tsü khipe azen nithen ki shüla lo; rhokedyü nmvue kenya pie atsünya lo, ale senmvu lo keshvu a-chvü tsü pe agin thyü shülo.

⁹Ale akesü thyülo lo n shamvu lao, Npugü le segü la? tsonzo so loshvu, nmvue ale tha ndila lo rühuo a Sunggigü zan thyü nshvu lalo keshvu genyu.

¹⁰Nle npunyu ka a-go gü nkhinshü nya, a-le nswetsüo nle kemu pfülo lo shvu laryü.

¹¹Temi peha le a-pvünyu swetsü lo jochü pe a-jvünyu tsühü kemvu le bin hünyo.

¹²Temi peha le rhusa bin ai a-npvü a-mhundyü ka a-le nshün letse kehü le bin hünyo.

¹³Temi peha le a-rüchün tetso-o a-le gwasa letse, a-mhun penkeli kehü le bin hünyo.

¹⁴Temi peha le kazü nyu tha kendinyu lo medannyu rhokedyü nyu dan tentyü titseo anyugun hü le zhethon lo zheshe hontse bin hünyo.

¹⁵Jonbe le a-nyu tenu mihvu le bin; au le nrao “Khishü” khishü tsehü! Tha konshen le a-kenyü thyülo hümvu: pezi le “Gwaso” tsezo hümvu:

¹⁶sika, nyuzen kemvui ginda, a-zintse teri kehü kazü, lo thame kae “Gwaso” tsezo hükemvu mah.

¹⁷Temi ligü higü a-pvü shwinyü kehü nmvue a-jvü kethen shwi ntsü kehü güle tegvü dan le a-yhütyü nduntho lola lo güda dan le tyü lati.

¹⁸Agenyu ndun thyüri kethyü tha konshen le bin; pezi gü le shalomvu:

¹⁹logi nme le tsangneki nye kegü tson gü, peri nme le tsonye sogen nyokegü tson gü, run nme le züda nyu kegü tson gü, lo temi nme le lünyu nme zen kengü kehü tson gü.

²⁰Menu keyüla kehünyu nme tson le hihontse: a-le tyülo njio a-mün shon lao, “Ale thame thyüzü mvule,” tsonzo bin hünyo!

²¹Tha konshen genyu kazü güle ndün bin nyo; lo konzi gü kazü güle nyhen keloi mvu:

²²gonyu nme le raja thyü kelo, lo kephonyu nme le tyütsü a-sü pfü kelo,

²³tenunyu mele sohü kemvu nme le a-nyepvü hyu kelo, lo mego gile a-npugi sun ka bin kelo.

²⁴Kazü nyu tha pezi le keshen, ai a-nyugun le thasha sa:

²⁵Ntyü: danle nkomvu, ai anyugun le tsangyün ka anyugun chvü ndalo lahü.

²⁶Badger: dan le nko kemvu nyukhu dan me, ai anyugun le tsonye nyu anyugun ka thyülo lahü.

²⁷Tsükhvu: le anyugun raja ndi, ai anyugun aphu kentsin-o tsonchü hü.

²⁸Kakhwei le nle nben pe khilo gwa, ai tsüle rajanyu kanyu bin hünyo.

²⁹Tha konshen le a-tsonkechü shwi gwasa, pezi güle a-kegü shwi züsa:

³⁰Shünyho, nyukhu dan nyu kenko tsin gü lo nme nshvuo rani shühü kemvu;

³¹tsonchü ketekho kehü terogüzü, tenyütse, lo raja nme le a-temi mhundyü ri gun kejü.

³²Nle phori-o ketekho hü yatselo nmvue thagwakemvu rhibin yatselo sun-o rüchün shüta!

³³Kechamvule methunyüzü rhü tselo a-pon le chwiryü hü, nyhinkon vüshülo tezi le chwiryü hü lo nyunkenta hüsü shülo kega lo hünyo.