Read Southern Rengma Naga KESHAJO 31 Bible Online

KESHAJO 31 - Southern Rengma Naga bible

KESHAJO 31

¹Massa raja gü Lemuel jo, a-jvü le pe a-senthyü keshü:

²“Nle a npvü anyu, ale sokehü gü, akehi keni keshü gü. Ano nyu lope nka zo tila?

³Nkenko khipe tenunyu tsünya, nmvue njvü pe rajanyu nkiela kehü dan tsünya.

⁴Tsüle raja nyu genyu kemvu, O Lemuel. Rajanyu le zu ketsüi mvu, nmvue kedanyu le zu kekvu nnyü nya.

⁵A-nyugun le zutsü lo-o tejvü gü nmhinla njio kenjü nyu mele nshwe kehü nyu jün kera toshü mvula lo kenshvu genyu.

⁶Zu kekvu pe nkie güzhü kelanyu tsüshüta, lo zu khipe anyun kenjün thyü kebinnyu tsühülo.

⁷Anyugun no tsülo-o anyugun rhokedyü lo kenjün kethyü nmhin lata.

⁸“Temi a-npvü a-genyu zoshülo kemvu dan genyu jozoshü. Lo a-keche kendinyu kenjü zoshülo.

⁹N mün kope kenjü nyu mejün kera lo, tson-o kendinyu lo rhokedyü nyu nopen shülo.”

¹⁰Segü le tenu kegwa nme hyulo gwatila! Tsügi le jewel nyeki a-min tsenkvu!

¹¹A-nyepvü le a-tenyensa hü, lo a-le thame kae rhodyü loha.

¹²Tsügi le a-keyhun then a-gen thakegwa thyüti gwakemvu nme thyüshü loha.

¹³Tsügi le thyühü lo flax ni fülo-o, a-npvü a-ben lope thathyü bin hünyo.

¹⁴Tsügi le hakethyü run hontse, nithen ki ketyüketsü sen ryü la hünyo.

¹⁵Tsügi le tsangkeben mhundyü soryüo a-kami nyu ketyü ketsü ndashü lo a-gogi nyu no nyu thyü tiyo zoshüla hünyo.

¹⁶Tsügi le kazü shwishüo heilo, tson-o a-le chün kelo pisa sen-o vain bin senlo la hünyo.

¹⁷Tsügi le a-kekvu thyü thathyü, nko nki lo tseri sa hünyo.

¹⁸Tsügi le a-hakethyü le kechwi le kebin sha, kheje nyue a-mah kenben le nmhüla hümvu.

¹⁹Tsügi le a-npvü ni zenhü, lo a-npvü a-phi do hü.

²⁰Tsügi le kendinyu lo rhokedyü nyu dan genyu nho hünyo.

²¹Tsügi le a-kaminyu genyu khetso nshvu hümvu, kechamvule keyünphi le kebin genyu.

²²Tsügi le a-npvü a-kebenphi thyülo; a-phinya le linen phi kenshün lo meren tse kethyü.

²³A-nyepvü le chwida ka rünyi pülü dan nyu dun kebin ka mele a-sha hünyo.

²⁴Tsügi le linen phinya lo senkephin dan thyülo-o pe hakethyünyu ka jweh shü hünyo.

²⁵Tsügi phinya le kenko lo teshwe le, lo siki ryükejü kie a-le a-sherhün hüti.

²⁶Tsügi le thakesha sen-o jozo hü, lo shwikenjün senkethyü le a-mün ka bin hünyo.

²⁷Tsügi le a-kaminyu shwikegwa thyü lohü, lo thathyü kentsü chvütyü hümvu.

²⁸A-nyenyu jule soryüo jochü kepfü gi tse a-ko tson-o a-nyepvü ai tsühontse, a-shweti.

²⁹“Me nunyu kechon le gwaritsin kethyü thyüshü, ai nle tsüdan aphu nye gwa laso.”

³⁰Mekenyü kethyü le tesa, lo kezegwa le ndi lati, ai tenunyu Npugü nshvu kehü gile mele shweti.

³¹Tsügi bentha sha gü khipe a-tsü shülo, tson-o a-tha dan no chwida ka a-shwe lolo.