Read Southern Rengma Naga KESHAJO 4 Bible Online

KESHAJO 4 - Southern Rengma Naga bible

KESHAJO 4

¹Anyudan, hagun pvüle nyu pe hagun senthyüyo tsü nyülo. Nyüpütsü lo tson yatselo hagun le tha shakekho loti.

²Ale nyu pe hagun senthyü binyo tsüle gwa, tsügenyu tsü aphu rüchün lo.

³Ale apepvünyu nyu nme thyüo ntsenyu thyü kehü ka,

⁴apvü le a senthyüo aka zoshü, “Ajodan sen tsekha binlo ale johokeshüdan rüchün-o yhunlo.

⁵Amün nyu chwikeryü jodan nmhin lanya lo tsünyu ranitin lanya! nsülo, lo thasha kekholo.

⁶Nle a-khe lanya, tson yatselo a-le n ntsen loti; a-solo, lo a-le nrikhun loti.

⁷Kensü hile thakon kentsen tsingü. Tsügenyu a-khilo lo nle thalihi hyuloyatse-e thasha ntsunlo.

⁸Kensü solo, lo a-le n thyü ngon shüti. A-thünpenlo, lo a-le kerühvu senryü n tsüti.

⁹A-le nyekepun tyü kezegwa lo raja perün pe n pe gen shüti.”

¹⁰Anyugü, ajo nyülo. Ale nka nyuzo shüyo tsü zenlo yatselo nle yhunthon loti.

¹¹Ale kensü pe nsenthyü shü lo ntsonri pe tson kenjü gü nyu shü shü laso.

¹²Nle nyuyhün-o tsonchü yatselo thame ntson khin loha, lo nle tin keshü ka npha nsü loha.

¹³Nle shalo kela dantsü rüchünzin hülo. Nthakesha tsüle n keyhunronzin gü-tsü ntsen kegwa thyülo ti.

¹⁴Temi serikemvunyu tson thennya. Temi gwakemvu nyu hontse nya.

¹⁵Tsü thyünya! tsünyu gü nya! Tsünyu ranilo njio nrhitin lalo.

¹⁶Serikemvunyu le tha gwakemvu thyüshü kemvu then zhü lo hümvu. Anyugun le temi peha nthyünnyü shü kemvu then we zhümvu bin hünyo.

¹⁷Serikemvunyu le me nthyünnyü kethyü tsüle anyugun chvü lo anyugun hon hontse kela genyu.

¹⁸Ai kemitsin nyu tson güle lonyü tsangkeben hontse, tsüle nhenyu lvu ti kemvu then ben ketsintsin bin hünyo.

¹⁹Serikemvunyu tson güle kezün kentsun hontse; anyugun le nyugen anyugun pha nsü hüyo shahümvu.

²⁰Anyugü, ale nyuzoyo nyü pütsülo. N nyetin kerüpe a-jo dan nyülo.

²¹Tsüno ngen tin lanya. Tsü rüchün binlo.

²²Anyugun le kerhün lo phu kesherhün pe lihigü anyu hyukelo nyu aphu tsüti.

²³Pütsülo nle dihontse tha rüchün hüyo; nkeyhun le nkerüchün hontse kehü genyu.

²⁴Lihie ketsin kemvu zonya. Kenku lo metson tsinzü kethyü tho thame thyünya.

²⁵Kenjü, kepeche sen-o mhundyü nrilo, mhundyü ki nri tonlo.

²⁶Ntson shwi pütsü kegwa thyülo, tson yatselo ntson aphu gwaloti.

²⁷thagwakemvu nrhio, njü mhundyü gunlo, tson kenjü nken-o kenkvu nme günya.