Read Southern Rengma Naga KESHAJO 7 Bible Online

KESHAJO 7 - Southern Rengma Naga bible

KESHAJO 7

¹Anyugü, ale nyuzoyo rüchünlo, lo ale nno nyuthyülo tsezo shüyo nmhin nya.

²Ale nyu zoshüyo thyülo, lo nle yhun loti. Nyhütyükentsen hontse pütsüo a senkethyü jo thenlo.

³Gwünkho aphuka a senkethyü jo no nzen hülo; tsüpe nnyun gen thulo.

⁴Kensü pe nlügi hontselo, lo tha shakekho kelo pe npvügü ketsigü thyülo.

⁵Tsonlo yatselo tsüle menu serikemvu nyu lo tenunyu zokegwazo-o mesa zen tinla kehü nyu bennyu nkeni loti.

⁶Gwüngwa nme ale aka kafüphe nyu nribin laryü,

⁷tsüka ale thakegwa keshvu shakekho hükemvu selo kechon kebin ka tsüdannyu kephonyu nme hyu.

⁸A-le tsonda then-o tenunyu nme le bin kehü quen nme kagü. A-le tsügi kakho ka güzhü,

⁹tsang zün kela siki.

¹⁰Tsüka tenu tsügi le anyunki rhikü pfüo serikemvu chün tyü kehünyu phinya bennya ryü a-tenolo.

¹¹Tsügi le kemhunkvu lo keja hü kemvu nme, a-le a-zintse tsonda nyu ho-o,

¹²khikalo tsonyu khikalo hakethyü binquen ki so-o me khwen bin hü.

¹³Tsügi le a-süpenlo-o a-nboshü, lo kezhamvu tse a-nrilo njio a-kazo,

¹⁴ale nthu kershvu thyülo tson-o tha dushvu pe kershvu kethyü ketyüketsü le binnyo.

¹⁵Tsügenyu ale npvü chwiryüle. Ale nhyulo nyübin laryü nle hika hü laso.

¹⁶Ale Ijipt nyu linen phi a-rhi kechacha kethyü pe azhüla njü nyo.

¹⁷Ale myrrh, aloes, lo sinnamon pe azhü rün thyü njü nyo.

¹⁸Ryülo! Nhi khensin keso bin tile. Nhin keso-o nhi kenyü thyübin tile nu.

¹⁹A nyepvü le kanyu ndi. A-le tsonthon ki njwen gü laso.

²⁰A-le raka kechon sentin laso, tsügenyu hapta kenyhun a-le ryü kemvui le.

²¹Tsügi le a-semen tenge tselola, lo a-jo kegwa dan genyu temi tsügü le a-nyun shü lola.

²²Tson-o methutse nme dushvu titse zen gun kejü hontse nmvue thyüzhie nme le mesen kagü kejü hontse tsügi then-o,

²³tholevü tsi nme le a-nyun jen nrün binnyu gunla. Tsüle a-keyhun lola nrün shamvutse-tegü nme le mesen nyu yü kejü hontse güla.

²⁴Tsügenyu anyudan, ntsoka akhwe nyülo, ale nyuzoyo rüchün kegwa thyülo.

²⁵Nnyun rani sen-o tenunyu tsühontse kehü nyu tsonnyu günya; tson gwün züo a-tson nyu günya.

²⁶Tsügi le temi kechon nkie laso, lo a-genyu sikela le swülo buha laso.

²⁷A-ka le kesinyu kegun tson, tsüle tson tsin pe kesinyu binnyu shülahü.