Read Southern Rengma Naga KESHAJO 8 Bible Online

KESHAJO 8 - Southern Rengma Naga bible

KESHAJO 8

¹Nyülo! Kensü le sen-o kobin. Tha shakekho kelo khwe nyü bin.

²A-le tson teka rinchothun gen lo tsonchonyu sobin.

³Nyida günyu keyütson khinrun ka, a-le kobin nle:

⁴“Temi dan, ale hagun ka hibin; ale kazünyu temi aphu kohü nle.

⁵Nnyun chünlo mvu ole? Thashalo-o nnyun chün lota. Nle kephonyu ole? Thashalo-o tharüchün lota.

⁶Ajo gwaritsin kethyü dan nyü lota; ale nka kezo dan aphu njüle.

⁷Ale nyuzoyo tsüle ketsin güle; ale kenku dan tsü ntsüle.

⁸Ale kezo dan aphu ketsin; kenku nmvue metson tsinzü kethyü nme ndi.

⁹Tha shakekholo kehünyu genyu tsü aphu njü; lo thakesha fü kehünyu genyu we tsü aphu gwa.

¹⁰Raka mvule asenkethyüjo gü khilo; lo suna kegwatsin gü nyeki thasha kekho kelo gü kejülo.

¹¹“Kechamvule kensü le rubie nyeki gwakvu; lo nle tepen kehü aphu pe tsü kendyü keloimvu.

¹²Ale kensü, ale nyuyhün le bin; lo ale tha shakekho kelo lo kenjü gü kesha le binnyo.

¹³Npugü kenshvu le gwakemvu kentsüle; ale ketekho, kemakin, gwakemvu tson, lo kenkujo dan ntsü hünyo.

¹⁴Ale tha shakekho kethyü lo kekvu le binnyo. Ale kensü lo thyülo kegwa le bin.

¹⁵Ale rajanyu kechepe no mesa gon hü lo mesa kedanyu le tejvü kenjü thyüshü hünyo.

¹⁶Rajanyu aphu akeche sen-o meketsen hü, kedanyu lo kekvunyu dan-e tsü hontse.

¹⁷Ale aso kehünyu sohü; lo afü tenge kehünyu le ahyuloti.

¹⁸Ale kenya lo teshwe sen hünyo, binlo kehü kenya lo gwakenye kelo.

¹⁹A rasha le suna ketsin nyeki gwakvu, lo ale nsha keshü le raka kegwa nyegwa.

²⁰Ale kemitsin tsonnyu tsonchü hü; ale kenjü tson gü then hünyo.

²¹Ale kenya khipe aso kehünyu tsühü, anyugun kanyu kenya khin kesü thyüshü hünyo.

²²“Binzen kanyu Npugü le a-tha keritsin dan, mhundyü nyu, asen hü laso.

²³Keritsinka, kazü thyükeshü mhundyü, binzen kanyu athyü shü laso.

²⁴Züda gü le chwikeryü mhundyü, zü le tsun chwiryü kemvu kanyu a nnyulo laso.

²⁵Kazüthun lo rincho dan rhen keshü mhundyü, ale chwiryü laso.

²⁶Sunggigü le kazü gü lo low dan nmvue nnyo keritsin güe thyükeshü mhundyü.

²⁷A-le tsang thyü keshü ka ale hü laso, a-le züda gü zühun keshü gwünkho katsü,

²⁸a-le nmhupe tsangne ki keshü ka, a-le züda günyu züketsun dan khinshe keshü

²⁹lo züda zü güno a-le zokeshü nyeki soryü nya lotse ahza keshü ka. A-le kazü gü binjweshü kethyü katsü ale hü.

³⁰Ale thathyü keshanyu nme hontse a-khoka hü, a-le khenyütse agenyu a-sherhün, a-zintse a-mhundyü nyu shekerhün thyühü--

³¹tson-o a-kazünyu asherhün lo temi dan shwipe akenyü hü.

³²“Tsügenyu, anyudan, akhwenyülo. Ale kezo hontse thyülo, lo nle nsherhün loti.

³³Hagun senkethyüjo nyülo-o thashalo. Thashalo; lo tsü khela nya.

³⁴Temi akhwenyü kehü gü khenyütsen a chonrha ka shwibin kehü gü, lo akhenpvü khoka khwebin kehü gü le-a-yhen kegwanyu le.

³⁵Kechamvule ahyukelo gü le kerhün hyulo ti, lo Npugü kenyü pfülo hünyo.

³⁶Ai agwünzü kela güle a-npvü a-jün lola hünyo; a ntsü kehünyu aphu kesi so hünyo.”