Read Southern Rengma Naga KESHAJO 9 Bible Online

KESHAJO 9 - Southern Rengma Naga bible

KESHAJO 9

¹Kensü le a-ka thyüo kachon tsenyü pe sen lo laso.

²Tsügi le keho genyu a-senru dushvu, a-vainzu keri lo a-miz nda lo laso.

³Tsügi le a-gogi dan no nyida nyu bin ketetso tsin gen meko shü lotse nishü laso:

⁴“Tha rüchün hükemvu temi dan, ryülo!” Lo kepho gü ka a-le zo-o,

⁵“Ryü achvü tyü lo ale keri kenjü vain zu tsülo.

⁶Tha rüchün hükemvu temi dan khelao yhun lo, tson-o thakesha tsonnyu tsonchü lo.”

⁷Me shwinyü kehünyu kemutsin pe hi keshünyu le keja kepfü hyulo hü. Lo temi serikemvunyu rhokeshü nyu le techeno lohü nyo.

⁸Me shwinyü kehünyu rhonya; tsonlo a-le nnrhi lati. Thakeshanyu nme rhoshü lo a-le nsoti.

⁹Thakeshanyu nme senthyü shülo a-le thashakenye loti. Kemitsin nyu nme senthyü shülo a-thakesha le chon kenye loti.

¹⁰Npugü kenshvu le kensü bin zen gü, lo Kenshün gü kesha tsüle thasha kekho kelo le.

¹¹Kechamvule agenyu njon le chon loti lo nkeyhun chen thyü nthon loti.

¹²Nle nsü yatselo nnpvü ngenyu kechwi, ai kenila yatselo nnpvü kenjün thyüti.

¹³Tenunyu kepho nyu le nrakvu; serimvu lo kejajvü sha hümvu.

¹⁴A-le a-kakhin khoka, lo nyida gü nyu bin ketetso gen dun bin hü,

¹⁵a-le a-nkentin kezhü, a-npvü a-thanyu njün gun kejünyu ko-o:

¹⁶“Temi ligü higü tharüchün lohü kemvu güno, hika rani ryülo!” Lo kepho gü ka a-le zo-o,

¹⁷“Rühukelo zü le nnyüh. Lo kebuo tensü ketyü le nkenyü kvule.”

¹⁸Ai a-le kesi le tsüka kebin, a-sinnyu dan le kesi kazü nyuyü kela shabin mvu.