Read Southern Rengma Naga SENKETHYÜGÜ 1 Bible Online

SENKETHYÜGÜ 1 - Southern Rengma Naga bible

SENKETHYÜGÜ 1

¹Hile senkethyü gü David nyugü, Jerusalem nyu raja gü jodan le.

²Tsü le a-kerun, a-kenrun tse senkethyü gü le zoshü. Keyhun hile a-kenrun, aphu a-kenrun.

³Nle thathyü hokeli bin, lo tsügenyu nyu kechwi le bin nla?

⁴Shehe me le ryü lo shehe me le tinla, ai kazü gü we kenme tse bin gwenzin.

⁵Yhüko le chwiryü hü lo chela hü, rani gü dika chwiryü mvulo shvuyo tsüka binzen nihü.

⁶Tsang le nbuo tesinzin gü, tesozin gü-hun tseo a-bin ka rani ryü lahü.

⁷Züri aphu tsun züda nyu tsü hü ai züda gü sü lomvu. Zü gü le ranio züri dan le diki binzen yo tsüka binzen ni.

⁸Tha aphu nnyun tsemi kelai-zolo bukeho nyunkenphü nme.Ngun yhütyü le hyu pe nsü lomvu; ngun yhütin le nyü kekü nyü lomvu.

⁹Himhundyü nyu hontse layo tsü hontse niti. Himhundyü nyuthyü layo tsü hontse thyü niti. Kazü apentha nyu tha keshün nme ndi.

¹⁰Anyugun le zoshü, shwishü ta, “Thakeshün peha le hika bin nle!” Ai tson mvu, tsü le ngun nnyu kelo mhundyü da nyu aphu thyü laso.

¹¹Temi nme gükela gwenkho ka nyu thyü layo rüchün loho, lo ryü kejü ki temi nme ntsoka gü tsü gwenkho keti ka nyuthyü layo rüchün mvu lati.

¹²Jozokebin ahigü hile Jerusalem nyu Israel nyu so raja thyü.

¹³Ale kazü higü nyu thathyü kela dan tsü shwi pütsüo shalo titse rhilo. Sunggigü le kenjün kethyü pe ngun ge shü njü.

¹⁴Kazü hinyu thathyü kela aphpu ale hyu, lo ale hagun ka zoshü bin nle, tsü aphu kenrun le. Tsü le tsangkenbu hü kebin hontse le.

¹⁵Nle nyu le keho layo tsü thyü kenjü loho; nle tsüka kendi dan swü keloi mvu.

¹⁶Ale a npvü a nthon-o, “Ale kedanyu nme so, amhundyü Jerusalem nyu kekvu sen keryü nyu aphu nyeki thasha. Nsü lo thashakekho kelo le dihontse ketsin yo ale shabin.”

¹⁷Ale thasha kekho kelo lo kepin, kensü lo kenu le dihontse kecha thyü yo shalo titse rhilo. Ai ale fü kelo le ale tsangkenbu hü kebin gwenzin tse shalo.

¹⁸Nle thasha chon lo nyun kenjün thyü chonkvu; nle sha chon lo tsüle n nthyü nnyü chon kethyü gwenzin.